Merkezê Îrtîbat û Çapemenîye yê Hêzanê Sûrîyeya Demokratîke (QSD) eşkera kerd ke Operasyonê Zixmkerdişê Asayîşî yê Dêrazorî yo ke 27ê tebaxe de dîya destpêkerdene bi serkewtişî qedîya.

Eşkerayîye de ame vatene ke sere de rejîmê Sûrîye û Tirkîya xeylêk hêzan waşt ke fîtne vejê la Hêzanê Sûrîyeya Demokratîke û şaranê herême destûrê nê nêda û ca dîya nînan:

"Hêzanê ma serkêşîya Meclîsê Leşkerî yê Dêrazorî de 27ê tebaxe de bi nameyê Zixmkerdişê Asayîşî operasyonêko  leşkerî da despêkerdene. Seba ke serra ravîyartî de çeteyanê DAÎŞî vera hêzan û şarê ma 60î ra zafêr hêriş kerdî vera hucreyanê çeteyan no operasyon dîya destpêkerdene. Hetê bînî ra êyê ke madeyê kungbîyayîşî roşenê ameyî hedefgirewtene.

Di rojanê verênan de operasyon senî ke ame plankerdene wina aver şi. Hêzanê asayîşî xeylêk çeteyê DAÎŞî û tacîrê madeyê kungkerdişî destbend kerdî. Rojhelat û vakurê Dêrazorî de 90î ra zafêr dewî ameyî pakkerdene.

Sere de hêzê dezgehê asayîşî yê rejîmê Sûrîye xeylêk hetan dî ke serkewtişê operasyonî  proje û plananê înan ê herême betal keno. Nê semedî ra nê hetan kerd ke hadîseyan biancê hetêkê bînî.  Xeylêk çeteyî rojhelatê Çemê Firatî ra ameyî berdene dewanê Dêrazorî. Nê çeteyê çekdarî bi nameyê artêşa eşîran bi hucreyanê çekdaran ê ke pabesteyê rejîmî yê, bîyî yew. Na artêşa ke nameyê ci ravîyereno xora pabesteya rejîmî ya.

- Operasyon eslê xo de vera hucreyanê rêxistina terorî ya DAÎŞî bi. Rejîmê Sûrîye kerd ke nê cîya ramojno ke Hêzanê Sûrîyeya Demokratîke û şaran biverdo pê la cehdkerdişê înan binkewtî.

- 125 dewê herêma Dêrazorî binê kontrolê Meclîsê Leşkerî yê Dêrazorî de yê ke pabesteyê Hêzanê Sûrîyeya Demokratîke yo. Problem û têmîyankewtişî têna 5 dewan de vejîyayî ke mensûbê rejîmî û sûcdarî kewtî nê dewan.

- Hêzanê ma rojanê verênan ê operasyonî de kerd ke probleman bêşîdetî çareser bikerê la kesanê çekdaran hêriş şaredarî, îstasyonê awe û dezgehanê xîzmetî kerd. Bitaybetî tesîsê awe yê Zibanî xirabe kerdî, diznayî, vêşnayî çîn kerdî. Kerd ke waranê sîvîlan de zî şer bikerê.  Na rewşe semedê hemwelatîyan tehluke bî. Coka şarî QSDyî ra waşt ke verê nê bigêro.

-Hêzanê ma vengdayîşê şarê taxe û rîsipîyan ser nê 5 dewan de dest pê pakkerdişî kerd û dewî kerdî pak. Xeylêk çeteyî teslîm bîyî tay zî remayî, şîyî waranê ke binê kontrolê rejîmê Sûrîye de yê.

- Tarîxê pêkewtişanê Sûrîye de çirey wina vera hêzanê ma fîtne û têmîyankewtiş nêvîyabi la heme şervan û fermandarê ma bi dîsîplîn û berpersîyarîye nizdîyê rewşe bîyî.

- Sere de rejîmê Sûrîye û Tirkîya xeylêk hêzan waşt ke fîtne vejê la Hêzanê Sûrîyeya Demokratîke û şaranê herême destûrê nê nêda û operasyon bi serkewtişî qedîya.

- Operasyon de 29 çeteyî ameyî kiştene, 25 şervan û 9 sîvîlî bi çekanê çeteyan şehîd bîyî. Dîmenan de zî ame vînayene ke çeteyan bi çekanê giranan û roketan hêrişê hêzanê ma kerd. Hetê bînî ra 4 endemê Dîfa El Wetenî yê yê rejîmê Sûrîye, 2 çeteyê DAÎŞî û 15 çeteyê bînî ameyî tepiştene. Operasyon de xeylêk çeke û teqaber kewt destê hêzanê ma.

-Artêşa tirke ya îşxalkere wextê Operasyonê Zixmkerdişê Asayîşî de bi hewayêkê hemwextî vera Mibic, Eyn Îsa, Girê Sipî, Til Temir û Zirganî hêrişî kerdî. Hêzanê ma cewabê hêrişan da û hêrişî peyser qeldayî û zirar da çeteyan.

- Ma şarê xo û serkêşanê komelê Dêrazorî rê spas kenê ke têkoşînê vera fîtneyî de paştî daye hêzanê ma. Ma soz danê ke ma do tim  vera çeteyanê DAÎŞÎ û êyê ke wazenê asayîşî bixeripnê, têkoşîn bikerê.''