Parlamenterê HDPyî: Ziwan cuya yo

Parlamenteranê HDPyî  bi wesîleya 21ê Sibate Roja Ziwanê Dayîke ya Dinya  ziwananê cîya cîyayan  ra dovîzê ''Ziwan cuya yo'' akerdî.

Parlamenteranê Partîya Demokratîke ya Şaran (HDP)  bi wesîleya 21ê Sibate Roja Ziwanê Dayîke ya Dinya meclîsê tirkî de kombîyayîşê çapemenî viraşt. Kombîyayîş de ziwananê cîya cîyayan ra dovîzê ''Ziwan cuya yo'' ameyî akerdene.

Parlamenterê HDPyî Dersime Dag, Merale Daniş Beştaş, Tulaye Hatîmogûllari, Serpîle Kemalbay, Kemal Bulbul, Zeynel Ozen, Gulîstane Kiliç Koçyîgît, Garo Paylan, Mehmet Ruştu Tiryakî, Kemal Pekoz û Mahmût Togrûl tewrê kombîyayîşî bîyî.

Bi nameyê parlamenteranê ke dovîzê ''Ziwan cuya yo'' akerdî Dersîme Dag eşkerayîye wende. Dage bale ante polîtîkya asîmîlasyonî ya dewleta tirke ser û vat: ''Rixmo ke cografyaya ma de zaf ziwan û kulturî estê tarîxê komare ra nata rîyê polîtîkaya herîşkare ra nê ziwan û kulturî hêdî hêdî çîn bênê. Zextê vera kurdkî her tim zêdîyenê la kurdkî rixmê hêrişê sîtematîkî estbîyayîşê xo rê dewam keno. 2016 de bi KHKyan rojname û sazîyê ke kurdkî şuxulnenê ameyî qefilnayene. Ganî nizdîbîyayîşo winayên bêro qedînayene û heme ziwanê ke Tirkîya de ciwîyene sey fernî bêrê naskerdene.’’