'Paytextê DAÎŞî' bi la nika şaristanê fikrê Neteweya Demokratîke yo

Reqa 4 serrî binê serwerîya DAÎŞî de paytextê ci bîye la peynîya serra 2017î de hetê şerwananê QSDyî ra ameye xelisnayene û nika zî bi fikrê Neteweya Demokratîke xo îdare kena.

Cerganê DAÎŞî 2013 de şaristanê Reqa îşxal kerd û xo rê kerd 'paytext.' DAÎŞî bi hezaran sivîlê Reqa vera hêrişan sey tirsê gandarî xebitnayî, kerdî qurban. 6ê hezîrana 2017î de Hêzanê Sûrîyeya Demokratîke (QSD) dest pê hemleya xelisnayîşê Reqa kerd. Xoverdayîşî ra dima 20ê teşrîna verêne ya 2017î de QSDyî bi hawayêkê fermî da zanayene ke înan Reqa azad kerda. 

Îbrahîm Silêmano ke şarê Hesekê ra yo, gazîyê şerê xelisnayîşê Reqa yo. Silêmanî derheqê hemleya xelisnayîşî de ANFyî rê qisey kerd.

Silêmanî da zanayene ke QSD hemle ra verî qezaya Mekmelî de kom bi û amadekarîya xo kerde. Silêmanî vat: ''Dima şerwanan verê xo da qezaya Cezratî û derbazê Reqa bîyî. Hemleya xelisnayîşî wina dest pêkerde. DAÎŞî Reqa kerdbî paytextê xo coka xoverdayîşê QSDyî ci rê bi derbêka girane. Wexto ke ma çarçewa hemle de derbazê dewanê Til Semin û Ebû Emşeyî yê Eyn Îsayî bîyî. Hemle ra 3 rojî dima erazîyê dewan gêrîya binê kontrolî. Uca de mayînêkê DAÎŞî teqa û linga mi qerifîyaye.

Mi hêvî kerdêne ke ez do hewa peyêne hemle de ca bigêra û merdiman binê zulmê DAÎŞî ra bixelisna. No xeyalê mi raşt nêbi la ma sey gazîyanê şerî hertim semedê na dewa xo ver bidê û têkoşînê xo rê dewam bikerê.''