Hêzanê Asayîşê Zereyî yê Rojawanî Kampa Holê de bi nameyê 'Operasyonê Asayîşî û Merdimîye' operasyonêk da destpêkerdene. Vervatoxê Hêzanê Sûrîyeya Demokratîke (QSD) Gabrîel Kîno, Vervatoxê Yewînanê Pawitişê Şarî (YPG) Nûrî Mehmûd û Endama Fermandarîya Pêroyî ya Meclîsê Herêma Cizîre Evînare Dêrik eşkerayîya operasyonî de amade bîyî. Eşkerayîye hetê Vervatoxê Hêzanê Asayîşê Zereyî Elî El Hesenî ra ame wendene.

Eşkerayîye bi kilmî wina ya:

''Şerê Sûrîye 10 serrî yo dewam keno. Nê şerî de bi hezaran merdimî merdî û neçare mendî ke erdê xo biteriknê.

2 serrî verî QSDyî pê hetkarîya Koalîsyonê Mîyanneteweyî DAÎŞ hetê cografya de çin kerd. Labelê DAÎŞ hema zî vera şarê herême û dinya tehlukeyêko pîl o. Hucreyê DAÎŞî hema zî Rojawan de sivîlî û îdarekaran kenê hedef. Sey Hêzanê Asayîşê Zereyî ma QSDyî reyde şerê vera DAÎŞî rê dwwam kenê.

Na rewşe de Kampa Holê wextêkê dergî ra nata herême ser o tehlukeyêkê pîlî virazena. Kampe de tewr tay 60 hezar kesî manenê û mîyanê nînan de xeylêk domanî estê. Nê kesî terefgîr û keyeyê DAÎŞî yê ke xo rê îdareyêko taybet awan kerd û bi nê hawayî DAÎŞ pawenê. Nînan tîmê El-Hesbî (polîsê DAÎŞî) û mehkemeyî nayî ro, domanan rê pê zorî materyelanê DAÎŞî musnenê. Bi nê hawayî dinya rê gefêko newe yeno wendene. Ganî nê domanî bêrê xelisnayene.

Îdareyo Xoser ê Rojawanî pêro hewcedarîyanê kampe goreyê îmkananê xo peyda keno, rêxistinê mîyanneteweyî paştî danê kampe. La Kampa Hole vurîyaye merkezê DAÎŞî. Sivîlê kampe kişîyenê û benê hedef. DAÎŞî emser têna 47 kesî kampe de kiştî.

Ewro Hêzê Asayîşê Zereyî pê destekê QSD, YPG û YPJyî Kampa Holê de seba çinkerdişê DAÎŞî bi nameyê 'Operasyonê Merdimîye û Asayîşî' hemleyêke danê destpêkerdene. ma do na hemle de pêro tedbîran bigêrê û kampe û roniştoxanê kampe belaya DAÎŞî ra bixelisnê.''