Endama Heyetê Rayberdişî ya Hemserekîya PYDyî Foza Yûsif ANFyî reyde qisey kerd û rojdem ercna.

Foza Yûsif vat : ''Neteweyanê Yewbîyayeyan wexto ke veng da ke pêro şerî vindarnê dewleta tirke goş nade nê vengdayîşî. Dewlete tirke wina bîya ke pê bombayan awa îstasyonî birnena. Pê şer û sîyasetêkê bêexlaqî wazena jan herême de vila bibo û verê felaketan abibo.  Tewirê rejîmê Sûrîye vera nê hêrişan qels o. No hêrişanê peyênan ê vera Til Temirî de ame dîyene. Dewleta tirke reyna qanûnanê mîyanneteweyîyan û serdestîya Sûrîye binpay kena.

Îdareyê Xoserî heta nika vera vîrusê Korona pê biranê raştan kedêka pîle mojna. Eke nêweşîye heta nika Rojawan de nêameye dîyene, no tesadûfî nîyo. Îdareyê Xoserî pêro îmkan, dezgeh, rêxistin û sazgehî vistî dewre. Prosesêkê winasênî de ma berpirsîyarîya xo komelî reyde pare kenê. Ma wazenê wa her kes xo berpirsîyar bivîno. Ganî ma pê dîsîplînî, paştdayîşî û tedbîran têbigêrê ke bieşkê verê janî bigêrê. Ganî ma yewbînan têna nêverdê, îmkananê xo pare bikerê. Merdimê ke wayîrê wijdan û exlaqî, rûmetî yê ganî tewrê kampanyaya Heyva Sor a Kurdîstanî bibê. Ganî ma paştî bidê pêro şarê xo. Xelisîyayîş pê komelbîyayîşî, cuya azade û paştdayîşî beno. Pê moral, manewîyat, sebir, fedakarî û berpirsîyarî ma eşkenê nê rojanê zehmetan derbaz bikerê.''