Şaristanê Kerkûkî de cinîyêke bi nameyê Sebrîye Ehmed a ke şahîda Enfalî bîye, wazena ke petrolê Başûrî seba Tirkîya nêro rotene, çunke Tirkîya seba çinkerdişê kurdan petrolê Başûrî xebitnena.
Sebrîye Ehmed Elî ya ke Qirkerdişê Enfalî ra xelisîyaye şaristanê Kerkûkî de selahîyetdaranê Herêma Kurdîstanî ra wazena ke hînî wa petrol nêroşê Tirkîya û vat: "Tirkîya bi pereyanê petrolê Kurdîstanî şer kena ke şarê ma çin bika. Nika zî hêrişê Rojawanî kena. Rojawanî ra dima qetî do hêrişê Başûrî zî bika."
Naje, birazî, ap, deza, dadîye û babî, xal, waye û 5 birayê Sebrîye Ehmed pêro Enfalî de şehîd bîyî û înan ra têna Sebrîya weş mende. Laj û camêrdê ci zî ameyî kiştene. Sebrîye vana: "Ewro yan zî siba rojêke Kurdîstan do ser bikewo. Keyeyê mi zî seba naye xo feda kerd."
Sebrîye Ehmed Elî sîyasetê ekonomîy ê hukmatê herême rexne kerd û vat: "Heta key petrolê ma do şoro Tirkîya? Tirkîya bi karê petrolê ma şarê kurdan çin kena, ma ser o çek û fîşekan varnena."
