Pêkerdişo Komelkî yê Rojawanê Kurdîstanî yo ke nê rojan de amebi tesdîqkerdene, komelê ekolojîkî, demokratîkî, azadîya cinîyan, ekonomîya komunale, edaletê komelkîyî û konfederasyonê demokratîkî esas keno.

Komîteya Amadekarîya Pêkerdişê Komelkîyî û Endama Meclîsê Cinîyan ê Rojawanê Kurdîstanî Bişare Qasim ANFyî rê qisey kerd û pare kerd ke Rojawan sey 7 kantonan do bêro dîzaynkerdene û Pêkerdişo Komelkî pêro kantonan do bipawo.

Bişare Qasim vist vîrî ke Rojawan de netewe û bawerîyê cîyayî ciwîyenê û vat: ''Seba ke nê beşê cîyayî bipawîyê ganî cuyêka hemmpare biameyêne awankerdene. Nê esasî ser o ma çarçewa neteweya demokratîke de Pêkerdişo Komelkî amade kerd. Pêro temsîlkaranê rêxistin, dezgeh, partî, dîn û mezheban no pêkerdiş tesdîq kerd. Bi Pêkerdişê Komelkîyî heqê pêro mezheb, dîn û neteweyanê cîyayan gêrîyayî binê garantî.

Xora Îdareyê Xoserî nê pêkerdişî de prensîbanê xo ra tawîz nêda. La bi nê pêkerdişî Îdayê Xoserî herêmê Rojawanî sey 7 kantonî dîyar kerdî; Cizîrê, Firat, Reqa, Tebqa, Dêrazor, Minbic û Efrîn-Şehba. Ancî Pêkerdişê Komelkîyî giranîyêka pîle daye perwerde û weşîye.''

Bişare Qasim îfade kerd ke ê seba Sûrîyeya Demokratîke têkoşîn kenê û vat: ''Pêkerdişo Komelkî modelêkî esas keno ke tede pêro rengê komelî temsîl benê û sîstemê meclîsanê şaran est o. Netîceyê sîstemê Sûrîye yê merkezîperestî werte de yê. Coka ma Pêkerdişê Komelkîyî de hedefê xo sey Komara Sûrîyeya Demokratîke pênase kerd. Hetê bînî ra eke Sûrîye de qanûnêkê bingeyî yê demokratîkî ser o pêkerdiş bêro kerdene ma do pêkerdişê xo de tay vurnayîşan bikerê.''