Caardişê qanûnê Sezarî rê çend rojî mendî. Pê qanûnê Sezarî DYA do ambargo bikera Sûrîye ser. Dewleta tirke ya îşxalkere zî Sûrîye û Rojawan de xebitnayîşê lîra ferz kerd. Seba naye dewleta tirke par Ezaz sey merkez weçîna û pê bahaneya qanûnê Sezarî Cerablûs, Bab, Efrîn, Serêkanîyê, Girê Sipî û Îdlîb de zî lîra ferz kerde. Na çarçewe de banknotê lîraya tirke pê rayîrê PTTyî herêmanê îşxalkerdeyan ê Rojawanî rê erşawîyayî. 

Lîraya Sûrîye destpêkê serra 2020î ra nata se ra 200 bêqîmet bîye. Yeno texmînkerdene ke qanûnê Sezarî ra dima lîraya Sûrîye do zêdêr bikewa û bazarî rê tesîrêkê giran bikera.

Hetê bînî ra ekonomîyê Rojawanî rê zî kewtişê lîra tesîrêko xirab kerd. Endamê Konseya Hemserekîye ya PYDyî Aldar Xelîlî derheqê babete de roja pancşemeyî bernameyê Bûyerî yê Ronahî TVyî de qisey kerd.

Aldar Xelîlî vat: ''Vanê lîraya Sûrîye bêqîmet bîye û pê na bahane derbazê lîraya tirkî benê. Rewşa herêma ma cîya ya. Ma lîraya Sûrîye xebitnenê. Nîyetê ma çin o ke Ma Sûrîye ra cîya bibê yan zî pereyêkê neweyî bivirazê. Qanûnê Sezarî pêşnîyaz keno ke ma lîraya tirkî yan zî dînarê Iraqî û dolar bixebitnê.  Ma lîraya tirkî qebul nêkenê. Iraq zî welatêko bîn û zehmetîya ci esta. Eke ma dolar bixebitnê ma rê o çax sîstemêko banka lazim o. Hetê bînî ra no zî birêka sîyasî ya. Ma beşêkê nê welatî yê û rojdemê ma yo winasên çin o.''