Hetkarê Hemserekanê Îdareyê Xoserî yê Rojawanî Bedran Çiyakurdî endamê Heyetê Îdareyê Xoserî yo ke bi mabênçîya Rûsya îdareyê Sûrîye reyde Şam de pêvînayîşî kerdî.Çiyakurdî derheqê pêvînayîşan û eşkerayîyanê Hetkarê Wezîrê Karanê Teberî yê Sûrîye Faysal El Miqdadî de qisey kerd.

Çiyakurdî bi meymanê bernameyê ''Bûyerî'' yê Ronahî TVyî û ard ziwan ke rejîmê Sûrîye bi aqlê verê şerê serra 2011î têgêreno.

Hetkarê Wezîrê Karanê Teberî yê Sûrîye Faysal El Miqdadî vatbi ''Ma Îdareyê Xoserî red kenê''. Çiyakurdî vera nê vatişan nêrazîbîyayîşê xo mojna û vat: ''No zîhnîyet çareserîya Sûrîye nêwazeno. No zîhnîyet krîz keno giranêr. Ma Şam reyde tay pêvînayîşî kerdî ke nê seba ma girîng ê. Eşkerayîyê bi nê hawayî yê îdareyê Şamî bibî babeta rexneyê ma. Îdîa kenê ke ma xîret kenê Sûrîye parçe bikerê. Ma nê vînayîş red kenê û vanê ke eleqeyê ci bi rastîye çin o.
Seba çareserîya sîyasî, îdarî, ekonomîke ya Sûrîye potansîyel û tecrubeyê Îdareyê Xoserî pîl ê.

Seba çareserîye û dîyalogan ma qerardar ê. Ma do seba ci têkoşînê xo dewam bikerê. Eke Sûrîye eşkerayîya winasêne dana no mojneno ke mabênê înan de cîyatîya vînayîşan esta. Xora rayîrê çareserîye û dîyalogan asan nîyo. Ganî îdareyê Şamî bi hawayêkê cîdîyî têbigêro û nêverdo ke her kes çîyêk vajo.''

Ver nê nêzdîbîyayîşanê Şamî heta nika Rûsya çîyêk nêkerd.  Rûsya zî Şamî ra cîya nêfikirîyena. Rûsya wazena ke Şam û Îdareyo Xoer nêzdîyê yewbînan bê la Îdareyo Xoser waştişanê Şamî û Rûsya qebul nêkeno. Rûsya vana 'Eke şima Şam reyde pêbikerê ma do hînî bêterf bibê, ma do qebul bikerê.' Ma seba garantorîye kesanê bêterefan wazenê. Na noqta de berpirsîyarîye kewena milê Rûsya.  Ganî Şamî rê teda bikera. Rûsya zî vînena ke agêrayîşê verê serra 2011î zehmet o. Nêzdîbîyayîşê sey 'Şam vajo se, şima qebul bikerê. Yan zî Şam do waştişanê şima qebul nêkero.' çareserîye rê fayde nêkeno û no nêzdîbîyayîş garantorîya Mokova zî çin keno.''

Lînkê bernameyî:

https://www.youtube.com/watch?v=XvaR6i5BvZ8&feature=youtu.be