Fermandaranê QSDyî ra Îsmet Şêx Hesenî bi wesîleya serrgêra 45. ya ronîyayîşê PKKyî ANFyî rê qisey kerd.

Şêx Hesenî ard ziwan ke PKK teyna seba şarê kurdî ney seba pêro şaranê Rojhelatê Mîyanênî newe ra bîyayîş o û vat: ''Dişmenî vatêne 'Ma kurdî kerdî binê erdî, hînî nêeşkenê sere wedarnê' la PKK ronîya. Wexto ke PKK bi felsefeya Rayber Apoyî vejîya werte hem Kurdîstan de hem zî Rojhelatê Mîyanênî de vurîyayîşî viraştî. Nê vurîyayîşî pêro dinya rê tesîr kerd. Dewleta tirke destkewteyê kurdan seba xo sey tehlukeyî vînena coka kurdan qir kena. PKKyî pêro planê qirkerdişî pûç kerdî.''

Îsmet Şêx Hesenî bale ante ser ke PKKyî bi hişmendîya wayûbiratîya şaran, pêro şaranê Rojhelatê Mîyanênî rê tesîr kerdo û vat: ''Şehîdê PKKyî yo verên tirk bi, Sûrîye de zî şehîdê ci yo verên ereb bi. Pêro şarî wayîrê PKKyî vejîyayî û tewrê ci bîyî. PKKyî ra ber qet yew rêxistinîye û partîye de fedakarîye nêameye dîyene. Bi hezaran kesî bê teredut koyan de şehîd bîyî û bi hezaran kesî zî koyan de şer kenê. 

Ruh û hêz ê ke PKKyî afernayê, pêro bindestan yew keno. Eke ewro kurd, ereb tirk, çerkez, armenî, tirkmen û şarê bînî seba yew armancî binê sîwana PKKyî de şer kenê no netîceya têkoşînê 45 serran o. PKKyî pêro şarê bindestî ardî yewca û wurznayî payan ser. PKKyî pêro sozê xo ardî ca. Bawerî û hêvîya ma tam ê. Ma do heqan û nasnameyanê xo bivisnê destî. Çar parçeyanê Kurdîstanî de û pêro dinya de serkewtiş do ê ma bibo.''