Vera Rojawano ke vurîyayo warê qirkerdişî yê dewleta tirke, bi hawayêkê demkî konseptê neweyî yenê caardene. Tewr peyên hetêkî ra bi hêrişanê droneyanê çekdaran serkêşê şorişî û welatperwerî kişîyenê, hetê bînî ra zî ambargo yeno caardene.
Îqtîdarê faşîstî yê AKP-MHPyî û dezgehê şerî yê bi nameyê Heyetê Asayîşî yê Mîlîyî (MGK) 30ê teşrîna verêne ya 2014î de Anqara de vera kurdan û Kurdîstanî Planê Çokdayîşî vistbi dewre û çarçewa ney de 24ê temmuza 2015î de bi bombarkerdişê Qendîlî qirkerdişê kurdan dîya destpêkerdene.
Hukmatê Anqara wextê hêrişanê DAÎŞî de dirîtîye kerde; hem selahîyetdaranê Şorişê Rojawanî de pêvînayîşî kerdêne hem zî çek û cebilxaneyî dayêne DAÎŞî. Dima ke kurdan DAÎŞ bi xoverdayîşê bêhempayî bin vist hînî dewleta tirke bi xo kewte dewre.
Hêrişê 'qesasî' yê vera Qereçoxî
Wextê operasyonê azadkerdişê Tebqa de 25ê nîsana 2017î de Koyê Qereçoxî yê herêma Dêrikî de 26 teyarayanê şerî Merkezê Çapemenîye yê YPGyî da bombayan ver. Netîce de 20 şerwanê YPGyî û kedkarê çapemenîye şehîd bîyî, 18 şerwanî zî birîndar bîyî.
Hêrişê vera Efrîn û Serêkanîyê
Hukmatê Anqara seba ke kurdî nêbê wayîrê statuyêkî dest pê operasyonêkê neweyî kerd. Wexto ke şerwananê YPG û YPJyî vera DAÎŞî Dêra Zorê de operasyon kerdêne dewleta tirke 2018 de Efrîn îşxal kerd. Efrîn bi 72 teyarayanê şerî 68 rojan dîya bombayan ver. Dima ke kelaya peyêne ya DAÎŞî Baxoz de ameye çinkerdene dewleta tirke narey zî 9ê teşrîna verêne ya 2019î de Serêkanîyê û Girê Sipî îşxal kerdî.
Dewleta tirke seba ke herêmanê îşxalkerdeyan bikera serê sînoranê Mîsak-i Mîllî merdimê herême qetil kerdî û ê wareyê înan ra kerdî. Qasê mîlyonêk merdim neçare mend ke koç bikero û herinda înan de cergî ameyî cakerdene. Nameyê kuçe, tax û dewî pê nameyanê tirkî bedilîyayî, ziwanê perwerde ame kerdene bi tirkî û pereyê herême ame kerdene lîraya tirkan.
Ambargo û ablûqa
Vera Rojawanî yo ke nêzdîyê 5 mîlyon merdimî tede manenê, hêrişê bînî zî ambargo û polîtîkayê ablûqakerdişî yê. Berê Sînorî yê Til Koçerî yoo ke mabênê Rojawan û Iraqî de yo, 2020 de kombîyayîşê Konseya Asayîşî ya NYyî de qefilîya. Berê Sînorî yê Sêmalka yo ke mabênê Rojawan û Başûrê Kurdîstanî de yo, hetê PDKyî ra tim qefilîyeno. Rejîmê Sûrîye zî nêverdeno ke malzemeyê xida biresê herêmanê Şehba, Helebe û taxanê Şêxmeqsûd û Eşrefîyê.
Dewleta tirke xîret kena ke pê Planê Çokdayîşî, hêrişan, ambargo û ablûqayan Şorişê Rojawanî bifatisna.
