Dima ke hêzanê PDKyî 5 gerîlayê HPGyî şehîd kerdbî û cenazayê înan nêdabî dezgehê Keyeyanê Şehîdan verê Berê Sînorî yê Sêmalka de çalakîya xeyme dabî dabî destpêkerdene. PDKyî naye ser o berê sînorî qefilna.

Endama Konseya Hemserekîye ya PYDyî Sema Bekdaş, Endama Kongreya Starî Nêrgize Bekîr û Xebatkara Meclîsê Şaredarîya Qamişloyî Mune Îbrahîm qefilnayîşê Berê Sêmalka û hêrişê dewleta tirke yê vera Şingalî ANFyî rê ercnayî.

Sema Bekdaş ard ziwan ke PDK Berê Sêmalka vera kurdan sey hacetê şantajî xebitneno û vat: ''Coka nika zî ber qefilnayo. Pê zor û zehmetî kesê birîndarî û nêweşî eşkenê berî ra derbaz bibê. Polîtîkayê PDKyî têna dewleta tirke rê fayde kenê. Rixmê hêrişanê giranan ê vera Herêmanê Pawitişî yê Medya hukmatê Başûrî bêveng o û hemkarîya dewleta tirke keno. Ganî partîyê kurdan bi yewîye têbigêrê. Ez venga hukmatê Başûrî dana ke herinda ke xizmetê dewleta tirke keno şarê xo rê xizmet bikero, Berê Sêmalka abikero.

Şingal wayîrê tarîxêkê kahanî yo. Ganî şarê ma wayîrê Şingalî vejîyo ke bi fermanan bêpawitiş ameyo warverdene. Şingal ewro eşkeno xo bipawo. Seba ke qirkerdişêko bîn nêqewimîyo ganî hukmatê Başûrê Kurdîstanî û Iraqî paştî bidê xoserîya Şingalî.''

Nêrgize Bekîr vat: ''Hemkarîya PDK û dewleta tirke vera kurdan xîyanet a. Şar hînî pê îxanetê PDKyî hesîyayo. PDKyî hêrişanê vera Şingalî rê ber akerd. PDKyî no çi Herêmanê Pawitişî yê Medya de zî kerd. PDK Efrîn de zî paştî dano cerganê dewleta tirke. La ma do heta peynî seba heqanê xo têkoşîn bikero.''

Mune Îbrahîm vat: ''Ma tim seba wayûbiratîye veng danê la PDK hemkarîya îşxalkeran keno. Ez hêrişanê vera Şingalî şermezar kena. Wexto ke kurdan meclîsê xo awan kerdî zorê dişmenî şi. Têna Şingal de nê Rojawan de zî wextêk verî keyeyê Guloyî ra 3 kesî ameyî şehîdkerdene.''