Merkezê Îrtîbatî û Çapemenîye yê HPGyî derheqê hêrişanê dewleta tirke de eşkerayîye daye.

HPGyî nê vatî: “Seke rayrapêroyîye zî zana hêzê ma 1ê adare ra nata bi prosesê adirbirnayîşî kewtî pozîsyonê bînî. La herêmanê Zap û Metîna de hêzê artêşa tirke nê sey fîrsetî vînena û kena ke waranê gerîlayan bigîro binê ablûqa. Wîna qeyde pozîsyonê adirbirnayîşî zaf xirabin şuxulnena û hedef kena ke xoverdayîşê tunelan îmha bikero. Ma rojane detayanê hêrişan pare kenê. Nînan ra zî yeno vînayene ke artêşa tirke vera tunelanê ma yê şerî bi teqaberanê giranan, gazanê kîmyewîyan, droneyanê bombabarkerdeyan, sondaj, kepçe û cekanê giranan hêriş kena. Rixmê qeraranê Kongreya 12. ya PKKyî artêşa tirke bitaybetî Başûrê Kurdîstanî de  rojanê peyêne de vera kampanê ma yê Girê Amediyê, Dewa Sêgirê yê ke nizdê qezaya Amediyê de û  Dewa Şêlazê ya Metîna de çekanê kîmyewîyan şuxulnena. Artêşa tirke bitaybetî nê hîrê kampan de bi çekanê kîmyewîyan îmhakerdiş hedef kena.

Eşkera yo ke seba ke vengdayîşê Rayber Apoyî û qerarê kongreya ma bêrê betalkerdene tay kesê ke naye ra rantê înan est o, tîya rol kay kenê. No zîhnîyeto ke şer û qirkerdişan wazeno şertanê adirbirnayîşî sey firsetî vîneno û bitaybetî nê hîrê nuqtayan de bi hewayêkê namerdi xîret kenê ke gerîlayan îmha bikerê. Hem bi çekanê ke warê mîyanneteweyîyî de qedexe yê hêriş kenê hem zî wazenê prosesê haştîye sabote bikerê. Ê ke nê hêrişan kenê wa bizanê ke; heta ke ê hêriş bikerî hêzê gerîlayan zî do heqê xo yê çalakîyan bişuxulnê û cewabê hêrişan bidê. Gerek no zîhnîyeto hêrişkar bêro vindarnayene. Xora eke pozîsyonê adirbinrayîşî ra nêbo ê nêeşkenê hende aver şirê. Eşkera yo wazenê nê ra feyde bikerê. Ma veng danê hetanê ke haştîye û çareserîye wazenê wa na babete de înîsîyatîf bîgîrê. Reyna ma veng dane dezgehanê ke vera şuxulnayîşê çekanê qedexeyan ê, heme dormeyê ke haştîye wazenê wa vera çekanê qedexeyan ke dewleta tirke Metîna û Zap de şuxulnena wa çalakîye bikerê.” 

Artêşa tirke hêriş kena, gerîlayî xo pawenê

Eşkerayîye de derheqê hêrişanê artêşa tirke û cewabê ke ameyî dayene nê ameyî parekerdene:

Hêrişê artêşa tirke;

“9 û 10ê hezîrane de Warê Xoverdayîşî yê Girê Amediyê yê Rojawanê Zapî de tunelê ma 11 reyî bi gazanê kîmyewîyan dîyayî bombayan ver. Reyna 5, 6, 9, 10 û 11ê hezîrane de tunelê ma 11 reyî zî bi  dironeyanê teqaber û gazê kîmyewî barkerdeyan dîyayî bombayan ver û 26 reyî zî bi kepçe û sondajan ame waştene ke bêrê rijnayene.

7 û 8ê hezîrane de tunelê ma yê Warê Xoverdayîşî yê Şêlazê yê herêma Metîna 5 reyî bi dironeyanê teqaber û gazê kîmyewî barkerdeyan dîyayî bombayan ver.

10ê hezîrane de warê Deşta Kafya yê herêma Garê bi teyarayanê şerî rayek dîya bombayan ver.

Mabênê tarîxanê 5–11ê hezîrane de warê Kanî Sarkê, Zêvkê, Deriyê Hirçê, Deşta Kafya, Dêreşê, Girê Zengil û Spîndarê yê herêma Garê,Warê Xoverdayîşî yê Serê Metîna, Bêşîlî yê herêma Metîna û Warê Xoverdayîşî yê Girê Amediyê û Girê Baharî yê Rojawanê Zapî bi çekanê giranan, top û obusan dîyayî bombayan ver.

Cewabê ke hêzanê ma dayî;

6 hezîrane de Warê Xoverdayîşî yê Girê Amediyê ya rojawanê Zapî de îşxalkeranê ke waşt hêriş bikerê hetê hêzanê ma yê YJA Starî ra ameyî pirodayene, kamerayêke û teqaber ameyî îmhakerdene. 9ê hezîrane de zî îşxalkeranê ke waşt tunelanê ma bi sondajî birijnê bi taktîkê sabotajî ameyî pirodayene.

10ê hezîrane de Warê Xoverdayîşî yê Serê Metîna yê herêma Metîna de îşxalkeranê ke waşt hêriş bikerê bi teknîkî ameyî pirodayene û radarêk ame îmhakerdene.”