Forûmê Alman-Kurdî (Deutsch Kurdisches Forum-DKF) 3ê nîsane de Rojawanê Kurdîstanî zîyaret kerdbi.

Serekê DFKyî Yunis Behramî derheqê zîyaretê înan de qisey kerd. Behramî pare kerd ke ê armanc kenê ke mabênê kurdan û hukmatê Almanya de dîyalogan ronê û vat: ''Ma nameyê sîyasetê kurdan ser o Almanya de dîplomasî kenê. Ma wazenê têgêrayîşê azadîye yê kurdan lîsteya terorî vejê. Dewleta tirke ya îşxalkere sey endama NATOyî kurdan terorîst îlan kena. Dewleta tirke Başûrê Kurdîstanî zî terorîze kena. Referandumê Kurdîstanî de na raştîye eşkera bîye.''

Behramî eşkera kerd ke sey Heyva Sor a Kurdan xeylêk dezgehê kurdan terorîze kerdî la şarê almanî paştî danê dezgehanê kurdan.

Behramî îfade kerd ke ê wazenê Îdareyê Xoserî reyde peymanêke îmza bikerê û vat: ''Ma wazenê mabênê xo û Îdareyê Xoserî de têkilîyanê weşan û xurtan ronê. Ma wazenê pê xebetanê xo paştî bidê Zanîngehê Rojava. Ma tay profesoranê almanan reyde têkilîye ronaye. Nê profesorê almanî do bi hawayêkê onlineyî Zanîngehê Rojava de dersan bidê.''