Hêrişê dewleta tirke ya îşxalkere yê vera Rojawanî Qamişlo û Dêrik de bi rayraşîyayîşêkî ameyî protestokerdene.

Qamişlo de heta Merkezê Komîserîya Karanê Multecîyan a Neteweyanê Yewbîyayeyan (NY) rayraşîyayîş ame kerdene. Rayraşîyayîş de pankarta 'Dewleta tirke ya faşîste pêro dinya rê tehdît a, ma vera nê terorî bigêrê' ameyî akerdene û sloganî ameyî vatene. Dima eşkerayîyêke ameye dayene. Eşkerayîye de venga NYyî, rêxistinanê heqanê merdiman û pêro dezgehan dîya ke verê îşxalê dewleta tirke bigêrê.

Dêrik de rayraşîyayîşê bi seyan kesan de pankarta 'Îşxalî rê ney, qirkerdişî rê ney' ameye akerdene. Dima verê merkezê Kongreya Starî de Hemserekê PYDyî yê Dêrikî Mutî Elîyî qisey kerd û vat ke hêrişê vera Rojawanî dewamê sîyasetê qirkerdiş û şiknayîşê îradeyê kurdan o. Çalakîye bi sloganê 'îşxalê tirkan rê ney' qedîyaye.