Hêzanê Sûrîyeya Demokratîke (QSD) da eşnawitene ke heme hêrişê vera dewanê  başûrê rojhelatê Minbicî bi serkewtişî ameyî peyserqeldayene.

Merkezê Çapemenîya QSDyî bîn şewe eşkerayîya nuştkîye daye û nê vatî: ''Heme hêrişê çeteyanê dewleta tirke ya îşxalkere yê vera dewanê  başûrê rojhelatê Minbicî hetê hêzanê Meclîsê Leşkerî yê Minbicî ra  bi serkewtişî ameyî peyserqeldayene. Hêrişê çeteyan de ê ke bi paştdayîşê hêrişê bi obus û hewayî yê dewleta tirke ameyî kerdene, hêzanê ma bi desan çeteyî kerdî bêtesîr û xeylê wesayîtê leşkerî îmha kerdî.

Pêkewtişan de yê ke saetanê serê sibayî de bajarekê Ebu Qelqelî û dormeyê ci û vakûrê Awbendê Tişrînî de ameyî kerdene, 14 çeteyî ameyî kiştene û bi desan çeteyî birîndar bîyî û 2 wesayîtê zirxinî, 2 wesayîtê doçkabarkerdeyî û 2 motosîkletî ameyî bêtesîrkerdene.''

Badê eşkerayîye Merkezê Çapemenîya QSDyî dîmenê çalakîya şervananê Komandosî yê herêma Awbendê Tişrînî pare kerdî.

Dîmenan de yeno vînayene ke şervanê Komandosî şinê nuqtayêka çeteyan û roket erzenê pencra ke çeteyî tira ewnîyenê. Nuqtaya ke roket îsabetê ci kena de teqayîş vejîyeno.

2 hewte yo ke şervanê QSDyî başûrê rojhelatê Minbicî û herêma Awbendê Tişrînî de cewab danê hêrişanê çeteyan û nêverdenê nê dewî bêrê îşxalkerdene.