Merkezê Çapemenîya QSD'yî bi eşkerayîyêke netîceyê hêrişê îşxalkarîye yê dewleta Tirkî yê 14'ê Teşrîna Verêne eşkera kerdî. 

Eşkerayîye de derheqê Xoverdayîşê Cengê Rojawanî yê cepheyanê Serêkanîye, Girê Sipî, Dirbêsîyê, Dêrikî de xeberî ameyî parbekerdene.

Eşkerayîye wina ya:

Cepheyê Serêkanîyê

"Xeta Alya de, cepheyê Rojawanî û cepheyê Rojakewtena de şer bi çêtinî dewam kerd. Artêşa îşxalkare bi hêrişanê hewayî, top û tankan waşt ke ver bikewe. Netîceyê şer o çêtin de tangêk, 2 panzerî û 2 wesayîtê doçka ameyî îmha kerdene; 59 çeteyî ameyî kiştene. Netîceyê xoverdayîşî de 11 şervanê ma şehîd bîyî û 24 şervanî birîndar bîyî.

Cepheyê Girê Sipî

Serê sibayî ra heta nê wextî teyarayanê keşfî serê pêroyê herême de fetilîyayî, hetê teyarayanê şerî ra bombardûmanî ameyî kerdene. Verba çeteyan Tirwazî û rayîro pêroyî de şerêk qewimîyo. Netîceyê nê şerî de panzerêk, tangêk û wesayîtêkê zirxî ameyî îmhakerdene û 38 çeteyî ameyî kiştene. Şero giran de 7 şervanê ma şehîd bîyî û 15 embazê ma birîndar bîyî. Xeta Slukê de pirodayîşê teyarayanê şerî de 4 şervanê ma şehîd bîyî.Rayîrê mabênê Eyn Îsa û Çelebî de çeteyê ke înan waştêne bikewê zere rastê cewabdayîşî yê şervananê ma ameyî û 4 çeteyî ameyî kiştene û şervanêkê ma şehîd bîyo.

Cepheyê Dirbêsipîyê

Artêşa îşxalkare bi top û çekanê giranan topbaran kerd. Netîceyê cewabdayîşî yê şervananê ma de 2 leşkerî ameyî kiştene, 4'ê înan zî birîndar bîyî.

Cepheyê Dêrikî

Dewa Xirba Belka ya serê Girkêlegê hetê dewleta îşxalkare ra ameye topbarankerdene. Teyarayanê şerî û keşfî serê şaristananê Rojawanê Kurdistanî de fetilîyayêne.

Pêroyê şerê roja 14'ê Teşrîna Verêne de 103 çeteyê artêşa Tirkî ya îşxalkare ameyî kiştene, bi desan birîndar bîyî. 2 tangî, 2 panzerî, 2 wesayîtê doçkaberkerdoxî û wesayîtêkê zirxî ameyî îmhakerdene. Nê xoverdayîş de 23 embazanê ma bi mêrxasî şer kerd û şehîd kewtî, 39 embazê ma zî birîndar bîyî."