Fermandarîya Pêroyî ya Hêzanê Sûrîyeya Demokratîke (QSD) bi wesîleya serrgêra 5. ya hemleya ke 23ê adara 2019 de vera çeteyanê DAÎŞî dîyaye destpêkerdene û Baxoz de peynîya çeteyan arde, eşkerayîya nuştekîye daye.

QSDyî sere de şehîdê hemlaya Baxozî yad kerdî û vat, ''Hêzanê ma bi mîlyonan sîvîlî destê terorîstan ra xelisnayî  û heme dinya na xirabîye ra xelisnaye.''

Eşkerayîye de wina ame vatene:  ''Çeteyan bi rayîrê hucreyanê nimiteyan xo newera organîze kerd ke kontrolî bîgêrê dest. Çeteyî rayberanê eşîran ê ke sey înan nêfîkirîyenî hedef genê, vera sîvîlanê ke dezgehanê îdarî û xizmetî de xebityenê hêirşanê bombayinan kenê. Hêrişê çeteyan hema dewam kenê. Operasyonê ma yê vera hucreyanê çeteyan dewam kenê la heta ke çimeyê îdeolojîya DAÎŞî merê ziwakerdene haştîya ke yena waştene nîna herême û dinya. Ganî heme dinya ra hetkarî bidîyo hêzanê ma. Hemkarîya bitesîre ya mîyanneteweyîyî hewce kena. Teror serranê ravîyarteyan de herême de bi sebebê rijnayîşê pîlî. Semedê newera înşakerdişê herême zî ganî hemkarîye bêro kerdene. Reyna hemkarîya semedê muhakemekerdişê çeteyanê tepişteyan muhîm a. Xora merdimê tepişteyanê ke Kampa Holî de  yê sey bombaya ganî yê.  No têna bi xo semedê dinya rîsk o û ganî her kes nê de eleqedar bo.''

Peynîya eşkerayîye de ame vîrvistene ke dewleta tirke ya îşxalkere paştî dana çeteyan û bale ameye hêrişê çeteyan ê vera Dêrazorî ser û wina ame vatene: ''Semedê binfînayîşê rêxitina terorî hemkarîya bitesîre ya mîyanneteweyîyî hewce kena.''