Hêzanê Sûrîyeya Demokratîke (QSD), îtîrafê 6  ajanan ê dewleta tirke yê ke tepiştî, weşanayî.

Eşkerîya QSDyî de nê ameyî vatene: ''Vera herême şero taybet yeno rayraberdene. Ciwananê herême rê ajanîye yena ferzkerdene. Sîvîlî yenê qetilkerdene, bi şantaj, tehdît û mefeatê madîyî ciwanî ancîyenê mîyanê teşkîlatê îstîxbaratî. Eynî wextî dewleta tirke surîyeyijê ke Tirkîya de yê înan rê zî zext kena ke ajanîye bikerê.''

QSDyî vat ajanî derheqê leşkerî, asayîş, dezgehanê xizmetê îdarî de zanayîş û koordînatan danê MÎT û hêrişanê kenê.

Nameyê ajanan ra yewî Ridwan El Yetîm o. El Yetîmî vat ey Ela Mihemed Nezîmî yo ke Tirkîya de ciwîyeno, reyde qisey kerd û ey ra ame waştene ke vera biney pereyî wa wesayîtan tafîno. El Yetîm û tay kesn Til Temir de wesayîtê hemwelatîyan fînayî hewayî.

Ajanê bi nameyê Emced El-Nasirî îtîraf kerd ke wexto ke o Tirkîya ra agêra kesêkê bi nameyê Mihemed Xerib Ebbasî ey ra waşt wa Til Temir û Hesekê de fotografanê hêzanê leşkerîy ci rê bişawo. El-Nasirî vat o ameyo tehdîtkerdene û fotografê 7 nuqtayanê leşkerî ante û MÎTî rê şawitê

Ajanê bi nameyê Fewaz El Hisoyî zî vat ey vîdeoyê 12 nuqtayanê leşkerî ante û kesê bi nameyê Ebu Nebilî rê şawitî û tira 75 dolarî girewt.

Ajanê bi nameyê Eli Berkelî zî ard ziwan ke ê fotografê xeylêk nuqtayan û koordînatê xeylêk nuqayan kesê bi nameyê Useme El Benawiyî rê şawitî û vat netîceya hêrişê nîşdandaranê tûjan de şervanêk şehîd bi.

Ajanê bi nameyê Ebdulezîz El Nasirî zî vat ey ra ameyo waştene ke wa fotografanê nuqtayanê leşkerîyan û fermandaran bianco bişawo.

Ajanê bi nameyê El Eliyî zî ard ziwan ke ey grûbêke nas kerd ke semedê MÎTî xebiteyena û vat ey Til Temir de fotografê tay fermandaran û nuqtayanê leşkerî antî û vera 700 dolarî teslîmê MÎTî kerdî.

QSDyî ard ziwan ke ajanî kerdişanê xo ra poşmanî û veng da ciwanan ke wa kayanê dewleta tirke ya îşxalkere rê mexapîyê. QSDyî vat hêzê înan do bi hewayêkê qerardarî ajanan tepişê û vejê vera edaletî.