Merkezê Çapemenîye yê QSDyî eşkera kerd ke înan Dêrazorê de safhaya diyîne ya Hamleya Çinkerdişê Terorî ya vera DAÎŞî daye destpêkerdene. Goreyê eşkerayîya QSDyî safhaya diyîne 17ê temmuze de dest pêkerd. QSDyî eşkerayîya xo de da zanayene ke ê do hêzanê Koalîsyonî reyde hamle bidê dewamkerdene.

Dima Merkezê Çapemenîye yê QSDyî pare kerd ke roja yewine ya Safhaya Diyîne ya Hamleya Çinkerdişê Terorî ya vera hucreyanê DAÎŞî de 24 çeteyî DAÎŞî ameyî tepiştene.

QSDyî nê zanayîşî dayî:

''Hêzanê ma saetanê serê sibayî ra pê hetkarîya Koalîsonê Mîyanneteweyî vera hucreyanê terorîstanê DAÎŞî Safhaya Diyîne ya Hamleya Çinkerdişê Terorî daye destpêkerdene.

Çarçewa hamle de bajarekanê Bisera û Şihelî yê vakurê Dêra Zorê de hêzanê ma eşt xeylêk cayan ser û kesê şikdarî tepiştî.

Sereştişan de dest nîya çeka kalaşnîkofî, BKÇ, demançeyanê bêvengan, roketê RPG-7î û çekanê cîya-cîyayan ser.

Hetê bînî ra sereştişan de 24 çeteyê DAÎŞî ameyî tepiştene.

Hamleya Çinkerdişê Terorî heta ke biresa armancê xo do dewam bikera.''