Hêzanê Sûrîyeya Demokratîke (QSD) vera torra ajan û hemkaran a ke şehîdvistişê fermandar û şerwananê serkêşan de rolê înan est o, dest pê Operasyonê Sondî kerd û xeylêk herêman de 36 ajanî tepiştî.

Derheqê babete de eşkerayîye wina ya:

''Dewleta tirke ya îşxalkere bi pêro hêzê xo wazena aramî û asayîşê herêmanê Sûrîye bi taybetî ê Rojawanî çin bikera, kaosî viraza, şertanê îşxalî awan bikera. Dewleta tirke seba ke nê armancanê xo bîyara ca herêmanê îşxalkerdeyan de cerganê DAÎŞî rêxistin kena, bi rayîrê îstîxbaratê xo herême de alozîye vejena, ajanan û hemkaran xo rê vînena. Dewleta tirke wazena pê metodanê gemarinan ê ajanîye fermandar û şerwananê QSDyî, hêzanê asayîşî, kesayetanê Îdareyê Xoserî hedef bihêra û embazanê ma şehîd bikera.

Vera nê kerdişan QSD û dezgehanê Asayîşî xebatêka hîra kenê. Netîceya na xebate de xeylêk ajan û hemkarî tepişîyayî, sûcê înan ameyî îsbatkerdene. Sey QSDyî ma çarçewa na xebate de 'Operasyonê Sondî' da destpêkerdene. Ma soz dabi ke hesabê şehadetanê Rênas Roj, Sosin Bîrhat û Egîd Girkê Legê bipersê. Coka ma no operasyon da destpêkerdene. Ma Qamişlo, Til Temir, Hesekê, Şeddadê, Dêrazor, Reqa, Minbic, Til Temir û Kobanê de 36 ajanî destbend kerdî. Beşêkê înan ajanîya xo îtîraf kerd. Îfadeyê beşêkê bînî dewam kenê. Nê ajanan ra tayînî bîyî sebebê şehadetê Sosin Bîrhat, Egîd Girkê Legê, Rênas Roj û embazanê sey nînan. Reyna şehadetê embaz Dilare Heleb û 2 embazanê bînan de, şehadetê embaz Hêcî û hemrayanê ci de destê nê ajanan est ê. Reyna nê ajanan Dêra Zorê de bîyî sebebê şehadetê 11 şerwananê QSDyî.

Ajanê ke tehqîqatê înan qedîyayo, sewqê dezgehanê edaletî ameyî kerdene. Kesê ke nê ajanan tanzîm kenê herêmanê îşxalkerdeyan Serêkaniyê, Efrîn, Cerablûs û Bab, Ezaz yan zî şaristananê sey Mêrdîn, Riha û Dîlok de manenê. Nê prosesê operasyonî de nê kesan ra tayênî ameyî cezakerdene.

Sey QSDyî ma sond wende ke mesuldar û faîlanê şehadetanê embazanê xo deşîfre bikerê û nînan ra hesab bipersê. Ma sond wend ke têkoşîn û xebatê ma yê vera dewleta tirke bi xurtî do dewam bikerê. Kam îxanet, ajanî bikero, nêzdîyê dewleta tirke bibo ma do nînan ra hesab bipersê û cezaya ke heq keno bidê ci.

Bi na wesîle ma venga şaranê xo danê ke pê ajanîye hişyar bibê û hetkarîya dezgehanê ma yê asayîşî bikerê. Wa her kes seba pawitişê welat û şarê xo erkê xo bîyaro ca. Wa şarê ma pê QSDyî bawer û hetkar bibê. Bi nê hawayî ma do xîretanê dişmenî bênetîce verdê û herêma xo bipawê.''