Endamê Konseya Hemserekîye ya PYDyî Aldar Xelîlî ard ziwan ke bira NATOyî konseptê neweyî yê vera kurdan ra parçeyêk o û vat: ''29ê hezîrane û Swêd tesadûfî nîyê. Seba hêrişêkê îşxalî yê vera kurdan nîşaneya destûrî dîyaye.
Hewteyê vîyarteyî de paytextê Spanya Madrid de kombîyayîşê berzî yê NATOyî de bedelê endamîya Swêd û Fînlandîya de tay tawîzî ameyî dayene dewleta tirke. Aldar Xelîlî kombîyayîşê NATOyî û tawîzan ser o ANFyî rê qisey kerd.
Aldar Xelîlî da zanayene ke dewleta tirke cara tim pê destekê NATOyî hêrişê kurdan kena û NATO bi xo dişmenê kurdan o. Xelîlî vat: ''Bi endamîya Swêd û Fînlandîya NATO bira xo newe keno. Bi nê hawayî NATO Swêdî rê vano 'Madem ti hê tewrê ma benî, o çax ti do morê xo bidî binê peymana şerê vera kurdan.' 1986 de wexto ke mesuldarîya cînayetê Olof Palmeyî erzîyabi milê kurdan ser, ney bi xirabî tesîrê kurdan kerd. Swêd reyna bi heman hawayî têgêra û newekerdişê bira NATOyî ya vera kurdan de bi binge. Ganî Swêd û Fînlandîya tewirêko cîya bimojnayêne. Nêzdîbîyayîşê înan hem rexne hem zî şermezakerdişî heqî keno.
PKK têgêrayîşê merdimîye yo, vera DAÎŞî şer kerdo û çew aciz nêkerdo. Seba rizaya dewleta tirke û NATOyî Swêd û Fînlandîya PKKyî kenê kurban. Ê 28ê hezîrane de ameyî pêser û 29ê hezîrane de birê xo eşkera kerdî. Seke zanîyeno 29ê hezîrane roja dardekerdişê Şêx Seîd û embazanê ci û muhakemekerdişê Rayber Apoyî ya. Na roje tesadûfî nîya. Ez venga dinya, Rojhelatê Mîyanênî û Ewropa, pawitoxanê azadî û demokrasî dana ke wa bibê wayîrê tewirêkî. Hînî no zî nêno qebulkerdene.
Dewleta tirke û hukmatê AKPyî qerardar ê ke temamîya Rojawanî îşxal bikerê. Erdoganî kombîyayîş de bi zelalî Rojawan kerd hedef û vat 'herême pêro do biba yê mi.' Çewî zî ci rê veng nêkerd. No zî nîşaneya destûrî ya. NATOyî bi endamîya Swêd û Fînlandîya nîşaneya destûrî daye dewleta tirke.
Seba pawitişî ganî ma zî sîstemê xo yê pawitişî xurtêr bikerê, şerwananê xo hîna bi profesyonelî rêxistin bikerê û şerê şarî yê şorişgêrî bikerê. Ganî ma keye û erdê xo meteriknê û heta peynî xo ver bidê. Dewleta tirke bira xo daya. Nika nêbo zî mengêke ra pey do hêriş bikera. Rejîmê Sûrîye zî hînî qels bîyo. Dewleta tirke wazena ney ra zî îstîfade bikera. Ganî ma bi xo destkewteyanê xo bipawê û ma herêmanê îşxalkerdeyan zî destê dewleta tirke ra bixelisnê.
Ganî şarê ma û pêro şarê Sûrîye, hukmatê Sûrîye, pîya serwerîya Sûrîye bipawê. Beno ke zere de meseleyê ma est bê la no erd yeno îşxalkerdene. Eke Sûrîye de cayêko bîn bêro îşxalkerdene hînî Sûrîye do nêmana. Dewleta tirke Sûrîye de têna kurdan hedef nêkena, wazena beşêkê Sûrîye dekera mîyanê erdê xo. Coka ganî pêro şarê Sûrîye tewrê xoverdayîşî bibê û tewirê xo eşkera bikerê.''
