Fermandaranê Operasyonê Asayîşî û Merdimîye ra Dilbirîne Kobanê derheqê operasyonî de ANFyî rê qisey kerd.

Dilbirîne Kobanê pare kerd ke her kes tehlukeyê Kampa Holî têna seyr keno û çew mesuldarîyêke nêgêno xo ser. Dilbirîne Kobanê vist vîrî ke înan par safhaya yewine ya operasyonî dabi destpêkerdene û vat: ''Seba ke DAÎŞ herême ra vila bibi û alozîye viraştêne ma operasyon dabi destpêkerdene û hucreyê DAÎŞî eşkera kerdbi. Serkêşîya Fermandare Jîyane Tolhildan de vera DAÎŞî kampe de wina gama verêne amebî eştene. Hêrişanê dewleta tirke ra safhaya diyîne ya operasyonî kewte erey. Seba ke tehlukeyê kampe vera bîyêne pîlêr ma safhaya diyîne daye destpêkerdene.

Estbîyayîşê na kampe têna seba herême nê seba pêro dinya û merdimîye tehlukeyîn bi. Şorişê Rojawanî seba ke şorişê merdimîye yo, erkê ma yo ke ma nê tehlukeyî werte ra wedarnê. Çarçewa operasyonî de cergê DAÎŞî tepişîyayî, xeymê ke cergan seba perwerde, îşkence û çalakîye şuxilnayêne, wedarîyayî. Cerganê DAÎŞî seba ke çekanê xo binimnê tunelî viraştbî û domanî pê hişmendîya xo resnayêne. Her kes tehlukeyê kampe vîneno la çîyêk nêkeno. Aya ke DAÎŞî kena xurtêr dewleta tirk a. Ma pêro kerdişanê DAÎŞî belge kenê û pare kenê. Sey şaranê Rojawanî ganî pêro şarê dinya bi hawayêkê mesuldarî wa nêzdîyê na mesele bibê.''

Vervatoxê Hêzanê Asayîşê Zereyî Elî El Hesenî bale ante ser ke kampe de 55 hezar kesî manenê û da zanayene ke ê QSDyî reyde seba asayîşê kampe xebitîyenê. Elî El Hesenî dîyar kerd ke meseleya Kampa Holî ganî warêkê mîyanneteweyî de bêra çareserkerdene.

Roniştoxanê Kampa Holî zî pare kerd ke ê DAÎŞî ra tersenê û vat ke seba asayîşê kampe operasyonê winasênî ganî bêrê kerdene.

Zaîne Muhammed îfade kerd ke ê tersî ra nêeşkenê kerdişanê cergan ver vejîyê û tersenê ke  eke gerreyê DAÎŞî bikerê bikişîyê.

Eyûb Necîm Ebdullah zî ard ziwan ke eke hucreyê DAÎŞî bêrê tepiştene ê do rehet bikerê.

Heya Hisêno ke çar serrî verî Iraqî ra ameyo kampe vart ke seba aramîya înan hewceyê înan pê nê operasyonî est bi.

Suheyla Humeyd Ebdullah zî vat: ''Zulmê DAÎŞî ra ma kampe de tersî ra ciwîyenê. Seba ke kampe de cînayet û qetilkerdişî zaf qewimîyenê ma serê sibatî şikir kenê ke weş mendê. Seba aramîya kampe no operasyon şert bi.''