Tepitşeyo nêweş Mehmet Emin Çam (73) o ke Zîndanê Tîpê Tyî yê Batmanî de yeno tepiştene 16ê nîsane de krîzê qelbî vîyarna û wedarîya Nêweşxaneyê Perwerde û Cigêrayîşî yê Batmanî. Çam badê anjîyoyî serwîsa ciewnîyayîşê giranî de gerîya binê tedawî. Çamo ke xeylê nêweşîye ci est ê 10 nîsane de zî wedarîyabi nêweşxaneyî, tîya şewêke mendbi û 11ê nîsane de reyna şawîyabi zîndanî.

Kênaya ci Şimele Çam ard ziwan ke xeylê nêweşîyê pîyê ci est ê,tedawîya ci mabênê çar dêsan de nêbena û wina dewam kerd: ''Reya diyîna ke pîyê mi krîzê qelbî vîyarneno. Doktoran ke o amelîyat kerd vanê rewşa ci xirab a û cayê ci zîndan nîyo. Maya mi vizêrî pîyê mi zîyaret kerd. Ey vatbi ermeyê ci kung bîyo. Xora o  felcbîyaye yo û mezgê ci de ur est o. Doktorî vanê ur beno gird û hîrê damarê ci zî gurete yê.

Çend rojî verî reyna ame berdene beşanê norolojî, kardîyolojî û fîzîkî û rixmê heme nêweşîyanê ci zîndan de tepişenê. Merdimanê ma mergî rê caverdene. Mesela di rojî verî pîyê mi ardo nêweşxane la xebere ma nêdaye.Ma semedê tehlîyeya ci heme dezgehanê eleqedaran rê muracat kerd la muracatê ma tim red benê. Avûkat siba do reyna muracat bikero.  Ma zanê ke qet nêweşêk zîndan de nîno tedawîkerdene. Ma semedê rewşa pîyê mi zaf qesawet kenê.''