Tevgera Jinên Azad-TJA Êlih de bi şîare ''Bi Jin Jiyan Azadî ver bi înşayê komelê demokratîkî'' têhetameyîşê cinîyan organîze kerd. Wekîlê DEM Partî Salîha Aydenîz, Zeynepe Oduncu, endamê Meclîsê Dayîkanê Haştîye, Hemşaredara Êlihî Gulîstane Sonuk a ke herinda ci de qeyûm ame cakerdene û xeylê aktîvîstê TJA tewrê ci bîyî.

Heyate de flamayê ''Jin, jiyan, azadî'' û fotografê cinîyan ê şehîdan ameyî daliqnayene. Aktîvîte bi rêzgirewtişî dest pêkerde.

Badê ramojnayîşê sînevîzyonî Rukene Zeryam Işik qisey kerd. Işike bale ante xoverdayîşê cinîyan ser û nê vatî: ''Rayberê Şarê Kurdî Abdullah Ocalanî semedê rêxistinkerdişî veng da. Her kurd gerek xo tewrê têkoşînî bikero. Cinîyî gerek rêxistinkerdiş de rolê serkêşî kay bikerê. Cinîyê kurdan ke dinya de serkêşîye kenê semedê serekwtişê vengdayîşê 27ê sibate çîyo ke destê ci ra yeno kenê.''

Dima ra Gulîstane Sonuk qisey kerd. Sonuke bale ante têkoşînê 8ê Adare, Newroze û 4ê Nîsane ser û wina vat: ''Bi mîlyonan kesê ke vejîyayî kuçeyan waştişê haştîye ard ziwan. Ma do têkoşînî xurtêr bikerê û bi serewktişî tacîdar bikerê.''

Salîha Aydenîz zî nî vatî: ''Semedê azadîya Rayber Apoyî her kes bîyo seferber.Vengdayîşê Rayber Apoyî vera zîhnîyetê qirkerî ke DAÎŞî û pabesteyanê ci cinîyan rê fasîlnayo cewab o. Vera sîstemê kapîtalîstî yo ke wazeno Rojhelatê Mîyanênî de waştişanê xo bi qirkerdişan bîyaro ca, cabêk o. No sîstem cinîyan têna sey koleyan vîneno. Bi nê prosesî cinîyî do destkewteyanê xo zafêr bikerê. Vera sîstemê camêrd devlete felsefeya Jin Jiyan Azadî do ser bikewo. Serkêşîya cinîyan de do komelo demokratîkî bêro înşakerdene. Ronayîşê nê komelî semedê heme şaranê dinya muhîm o.''