Rêxistina Hetkarîye û Paştdayîşê bi Astengdaran a Nûdeme hetê madî û manewî ra tewr tay 30 hezar astengdaran rê hetkarîye dana. Rêxistina Nûdeme 2021 de ronîyaye. Rêxistine 23yê teşrîna verêne de do konferansê xo bikero. 

Vervatoxa Rêxistina Nûdeme Davyane Mehmûd ANFyî rê qisey kerd.

Davyane Mehmûd dîyar kerd ke rêxistina înan seba ke cewab bida îhtîyacanê astengdaran ronîyaya û vat: ''Ma hêverî xo resna astengdaran, dima ma babeta astengdaran de komel perwerde û hîsger kerd. Astengdarî tewrê komelê cuye nêbîyêne. Keyeyê domananê astengdaran zî pê na rewşe qayîl nêbîyî. Ma kenê ke mîyanê komelî de rewşe normalîze bikerê. Xebatanê ma ra dima hînî keyeyî bi zerrîrehetî domananê xo yê astengdaran vejenê teber. Ma seba hîsgerkerdişê komelî karê perwerdeyî reyde destekê psîkolojîkî zî danê.

Nika ma xebat û projeyanê neweyan ser o xebitîyenê. Herême de qasê 30 hezar astengdarî est ê. Îmkanê herêma ma kêm manenê. Ganî rêxistinê mîyanneteweyîyî zî paştî bidê ma. Ma armanc kenê ke yew merkezê perwerde û fîzyoterapî abikerê. Xebatkarê ma yê zerrîwazî her ca de xo resnenê astengdaran. La îhtîyacî zaf ê, hetkarîyî kêm ê. Ganî komel hîna zaf hetkarîye bido astengdaran.''

Endama Komîteya Perwerdeyî ya Nûdeme Fehîme Eses ard ziwan ke ê hêverî keyeyan rê agahîyan û feraset danê û vat: ''Teyna keyeyanê astengdaran rê ney pêro komelî rê ma perwerde danê. Seba ke astengdarî mîyanê komelî de rehet têbigêrê ma xîret kenê. Ma xebatanê xo goreyê rewş, serr, perwerde û îhtîyacanê astengdaran amade kenê.''

Newroze Ehmeda 17 serre ya ke astengdar a vat: ''Ez kêfweş a ke rêxistinêka ma ya winayêne est a. Nûdeme îmkanê perwerdeyî da ma. Şuxilnayîşê kamera xeyalê mi bi û mi perwerdeyê ney dî. Hînî ez hîs nêkena ke astengdar a. Astengîya min a fîzîkîye est a la ez pê ci eşkeran. Nika ez bi xo hetkarîye dana astengdaran.'' 

Mihemed Ebas (22) vat: ''Bi ronîyayîşê Rêxistina Nûdeme komel bi wayîrê ferasetî. Ma zî hînî eşkenê tewrê cuya komelkîye bibê. Verê cû embazê mi çin bîyê la nika est ê. Ez vurîyaya. Mi dî ke astengîya fîzîkîye verê ma de asteng nîya û ez eşkena her çî bikera.''