Xeylêk rêxistinanê kultur û hunerî yê Rojawanî paştî daye hemleya ke semedê azadîya Rayberê Şarê Kurdî û çareserîya meseleya kurdan 10ê teşrîna verêne de dîyaye destpêkerdene.

Eşkerayîya hempare ya ke Qamişlo de ameye kerdene, Têgêrayîşê Hîlala Zêrîn, Heyetê Kultur û Hunerî, Yewîya Hunermendan, Komîteya Roşnvîr û Edebîyatkaran û Têgêrayîşê Huner û Kulturî yê Mezopotamya tewrê ci bîyî.

Rêxitinanê kultur û hunerî da zanayene ke ê zî paştî danê hemleya mîyanneteweyî ya ke hedefê ci de azadîya fîzîkîye ya Abdulllah Ocalanî est a.

Eşkerayîye ke verê Merkezê Huner û Kulturî yê Mihemed Şêxoyî de ameye dayene de bale ameye antene muhîmîya azadîya Abdullah Ocalanî ser. Eşkerayîye de ame vatene ke şorişê Rojawanî ke bi fikîr û felsefeya Abdullah Ocalanî ame kerdene heme şarî, grûbî, qoqê etnîkî û dînî binê serbanêkî de top kerdî û no tecrube semedê heme dinya bi nimûneyê modelêkê îdareyî.

Rêxitinanê kultur û hunerî vat, “Teberê modelê netewa demokratîke de qet modelê îdareyê bînî nêeşkeno şarê herême bixelisno" û semedê tewrbîyayîşê hemle veng da.
Badê eşkerayîye çalakwanan çalakîya xeyme ya ke 7 rojî yo verê banê Komîserîya Berze ya Multecîyan a Neteweyanê Yewbîyayeyan de yena kerdene, zîyaret kerd.