Hemserekê Meclîsê Sûrîyeya Demokratîke (MSD) Riyad Derarî derheqê pêvînayîşanê mabênê Tirkîya-Sûrîye-Rûsya de ANFyî rê qisey kerd.

Riyad Derarî vist vîrî ke dîyaloganê serekanê îstîxbaratî yê Sûrîye-Tirkîya ra dima Wezîranê Pawitişî zî pêvînayîş kerdo û vat: ''Pêvînayîş bi destpêkê îtîfaqê gefwerdişanê wird terefan. Tay waştişî ameyî parekerdene la tay babetî nimite mendî û nêameyî eşkerakerdene. Rûsya wextêkê zehmetî de ya coka pêvînayîşê Tirkîya-Sûrîye ci rê fayde keno. Dewleta tirke zî seba ke hêrişanê vera Rojawanî ra nêeşkaye netîce bigêra verê xo da rejîmê Şamî û waşt ke Peymana Adana reyde cayê vengî debikera. Eke Tirkîya rejîmê Şamî de pêbikera û debikewa Sûrîye no dûştê menfaetanê şarê Sûrîye do bibo û bikero ke cergê Tirkîya herême de cabibê. ''

Derarî pare kerd ke pêvînayîşê Esad û Erdoganî do hukmatê Şamî rê fayde nêkero û vat: ''Hukmatê Şamî tedaya Rûsya ra nê pêvînayîşan qebul keno û paweno ke tira  netîceyêke bigêro. Nê pêvînayîşî çend derg bibê hende faydeyê Rûsya kenê. Rûsya kena ke bi rayîrê Tirkîya vera Ukrayna ser bikewa û Tirkîya ci rê sînoranê xo Rûsya rê abikera. MSD destpêkî ra nata terefgîrê dîyalogan ê. Nê esasî ser o ma venga hukmatê Şamî û muxalefetê Sûrîye da ke qanûnê bingeyî yê nikayênî û pêvînayîşanê Cenevre de bieşkê birêke bidê. La înadê wird terefan ra gamêke nêerzîyaye.

Rojawanî têkoşînê vera DAÎŞî de sîstemê xo awan kerd û hêzanê mîyanneteweyîyan ra zî paştî girewte. Ganî hukmatê Şamî bizano ke heqê şarî est ê û şarê xo reyde seba awankerdişê welatêkê neweyî ganî polîtîkayanê xo bivurno.''