Endama Fermandarîya Pêroyî ya YPJyî Rohilate Efrîn bi wesîleya serrgêra şehadetê Fermandare Bêrîtane Hêvî (Gulnaze Karataş) ANFyî rê qisey kerd.

Rohilate Efrîn da zanayene ke YPJ serê kokê mîrasê şehîde Bêrîtane de ameyo averberdene û vat: ''Ez hêverî serrgêra 31. ya artêşbîyayîşê cinîyan fîraz kena. Ewro artêşa cinîyan îradeyê cinîyan ê azadî temsîl kena. Cinîyî tim çin hesibîyayî, îradeyê cinîyan raştê hêriş û tedayan ame. La cinîyan tim zî vera sîstemê serdestîya camêrdan têkoşîn kerd. Bi taybetî cinîyan ê kurdan mîyanê têgêrayîşê azadîye de serkêşîya nê têkoşînî kerde û artêşa xo naye ro. Artêşa ma ya cinîyan teyna yew artêşa leşkerî ney artêşa îdeolojî û felsefîk a. 31 serrî yo artêşa cinîyan YJA-Star tesîrê pêro cinîyanê dinya kena. 

YPJyo ke 11-12 serrî yo mîyanê têkoşînêkê pîlî de yo, dewamê nê mîrasî yo. YPJ berhemê mîrasê artêşbîyayîşê cinîyan o ke 31 serrî yo xoverdayîş û têkoşînî rê dewam keno. YPJyî vera rejîmî, îşxalkeran û cerganê sey DAÎŞî têkoşînêko pîl kerd. YPJ nê têkoşînî de wayîrê mîrasê 31 serran vejîya. Pêro cayanê Rojawanî ra cinîyî zî tewrê YPJyî bîyî. YPJ bi nê hawayî pêro dinya de şinasîya û tesîr kerd. 

Xoverdayîşê embaze Bêrîtane yê vera îxanetî ewro zî dewam keno. Embaze Bêrîtane vera teslîmîyetî çalakîya azadîye kerde. Embaze Bêrîtane bi çalakîya xo vat ke 'Ma ney hêzê xayînî do teslîm bibê.' Xeta embaze Bêrîtane bîya xeta winayêne ke eşkena pêro cinîyan mîyanê xo de yew bikera. Embaze Bêrîtane xeta cinîyanê sey Besê û Zarîfeyan xurtêr kerde, teslîmîyet red kerd. Ewro mîrasê aye Rojawan de bi têkoşînê YPJyî payan ser de yo.

PDK ewro xeta îxanet û teslîmîyetî de israr keno. Dewleta tirke her roje hêrişê Rojawanî kena.  La PDK hemkarê nê îşxalkerî yo. Ganî şarê ma yê Rojawanî vera nê îxanetî tewirê xo bimojno. Vera xeta îxanetî cewabo tewr pîl temsîlîya xeta xoverdayîş û têkoşînî ya. Ma sey YPJyî do tim xeta xoverdayîş û têkoşînî ya Bêrîtane xo rê esas bikerê.''