Rixmê têkoşînê 5 serran ê vera DAÎŞî Rojawan de xêr û bereketêko pîl bibi. Zîret Rojawan de bi çimeyê debarî yê şarê herême.  Labelê serra 2019î de dewleta tirke û hêzê ci yê paramîlîteran pê destê DAÎŞî dest pê vêşnayîşê erazîyanê zîretî kerd ke hem cerganê xo Rojawan de ca bikerê hem zî Îdareyê Xoserî tasfîye bikerê. 

Serra 2019î de hêrişan de tewr tay 453 hezar donim erazîyê zîretî ame vêşnayene, serra 2020î de hêrişê dewleta tirke û cerganê ci de heta nika tewr tay 100 hezar donim erazîyê zîretî ame vêşnayene. Şar û Îdareyo Xoser ê Rojawanî vera nê hêrişan têkoşîn kenê.

Hemserekê Heyetê Ekonomî û Zîretî yê Îdareyê Xoserîya Demokratîke Selman Barudoyî pare kerd ke dewleta tirke ya îşxalkere û cerganê ci pê vêşnayîşê erazîyanê zîretî xîret kena ke şar vêşan biverda.

Serra 2019î de Îdareyê Xoserî seba cigêrayîşê sebebê şewatan  komîteyêke awan kerde. O çax DAÎŞî keyepelê xo yê resmîyî de îlan kerdbi ke înan şewatî serûber kerdî.

Guleeştişê dewleta tirke zî bi sebebê şewatan. Serra 2019î de dewleta tirke sînor de hêrişê citkar û îtfaîyan kerd ke înan şewat hewna kerdêne.

Goreyê cigêrayîşê Îdareyê Xoserî 16ê hezîrane ra heta nika hêrişan de warê zîretî yê 42 hezar hektaran ame vêşnayene. Par çarçewa bira Îdareyê Xoserî de citkaran rê seba şewatan hetkarîye ameye kerdene. Selman Barûdoyî da zanayene ke tewr tay 6 hezar citkaran rê hetkarîye ameye kerdene.

Reyna tîmê îtfaîya ameyî awankerdene, 60 wesayîtê îtfaîya ameyî amadekerdene û 1000 tupê hewnakerdişê şewatî ameyî vilakerdene. Hêzanê Asayîşê Zereyî 30 hezar endamê xo seba pawitişê erazîyan wezîfedar kerdî. Hêzanê Pawitişê Komelkî zî 15 hezar endamê xo seba pawitişê erazîyanê zîretî wezîfedar kerdî.

Rixmê pêro tedbîran zî dewleta tirke ya îşxalkere û cerganê ci adir verda erazîyanê ÎDareyê Xoswerî. Nînan menga gulane de warêkê genimî ya 100 hezaran, 360 donim baxçeyê zeytunan vêşnayî.

Goreyê zanayîşan:

Til Temir de 13 hezar donim, Zirgan de 17 hezar donim erazîyê zîretî ame vêşnayene.

Herêma Firatî de 35 zeytûnêrî û 21 hezar û 560 donim warê zîretî ameyî vêşnayene.

Minbic û dewanê ci de şewatê cergan de 540 donim erazîyê genimî û 360 donim baxçeyê meywe û zeytunan ameyî vêşnayene.

Şehba de 600 donin erazîyê genimî û cewî û 3 hezar û 500 zeytûnerî ameyî vêşnayene.

Qezayabê Til Berakî û Til Hemisî yê Kantonê Qamişloyî de 4 hezar donim warê zîretî ame vêşnayene.

Dewanê Hesekê de 27 hezar û 70 donim erazîyê zîretî hetê cergan ra ame vêşnayene.

Dêra Zorê de 14 hezar û 100 donim erazîyê zîretî zerar dî.

Selman Barûdoyî vat: ''Wexto ke wesayîtê îtfaîya şinê cayê şewatî cergê dewleta tirke ya îşxalkere bi çekan hêrişê ci kenê.  Nê hêrişan de 3 sivîlî merdî, 2 sivîlî birîndar bîyî. Dewleta tirke wazena ke şarê ma vêşan biverda. La ma do paştdayîş xurtêr bikerê. Îdareyo Xoser şarê xo reyde yo. Ganî şarê ma zî vera nê hêrişan zêdêr hîşyar bibo.''