Vervatoxê Înîsîyatîfê Abdullah Ocalanî rê Azadîye yê Rojawanî Ferzende Munzurî ANFyî rê qala kampanyaya înan îmzayan kerd ke 9ê sibate de dîyabî destpêkerdene.

Munzurî îfade kerd ke seba azadîya Rayberê Şarê Kurdî Abdullah Ocalanî asta seferberîye de karî yenê kerdene û vat: ''Çarçewa kampanya de keyeyan ra, dezgehan ra îmzayî arê dîyenê, standî ronîyenê. Heta nika ma 1,5 mîlyon îmzayî arê dayî. Kampanyaya îmzayan do heta 4ê nîsane dewam bikera.''

Munzurî da zanayene ke înan ancî 29ê sibate de dest pê kampanyaya mektuban kerdo û vat: ''Çarçewa kampanya de ma 11 dezgeh û rêxistinanê huqûqî yê sey Doktoranê Sînornenasan, Rêxistina Efû ya Mîyanneteweyîye, Konseya Heqanê Merdiman a NYyî, Komîteya Vergirewtişê Îşkenceyî (CPT),  Konseya Ewropa, Mehkemeya Ceza  ya Mîyanneteweyîye, Dîwanê Edaletî, Rêxistina Vergirewtişê Îşkenceyî ya Heqanê Merdiman (HRW) rê mektubî şawitî û qalê bêhuqûqîyê ke Îmrali de yenê kerdene, kerd. Rayber Apo temsîlkarê şarêkî yo. Vera ey binpaykerdişê cidîyî est ê. Ma zî naye ra kampanyaya xo ya mektuban daye destpêkerdene.''

Munzurî vist vîrî ke Heyetê CPTyî mabênê 13-22yê sibate de zîyaretê Tirkîya kerdo la nêşîyo Îmraliyî. Munzurî vat: ''Îmrali merkezê îşkenceyê  tewr giranî yo. Nê wextî de ke şarê ma û dostê ma vera îşkence û kerdişanê Îmraliyî vengê xo berzêr kenê CPT goreyê erkanê xo tênêgêreno û menfaetanê Tirkîya ano ca. Mîyanê mengêne de tewr tay çar reyî Marmara de erd lerza. Ganî Rayber Apo bieşko keye û avûkatanê xo bivîno. Ma nêzanenê ke Îmrali de çita qewimîyeno. Ganî CPT erkanê xo bîyaro ca.''