Rojawan de 4 hezar û 160 dibistanan de 890 hezar û 680 wendekarî bi ziwanê dayîke perwerde vînenê. 41 hezar û 867 mamostayî bi kurdkî, erebkî û sûryankî perwerde danê domanan.

Şorişê Rojawanî ra dima 2012 de hêverî 97 dibistanan dest bi perwerdeyê ziwanê dayîke kerd. 2013 de zî Dezgehê Ziwanê Kurdkî (SZK) ronîya.

Rojawan de 27ê teşrîna verêne ya 2015î de zanîngeho verî Zanîngehê Efrînî ame akerdene. Dima Zanîngehê Rojava, Zanîngehê Kobanmê û Zanîngehê El Şerqî ameyî akerdene.

Hemsereka Heyetê Perwerde û Banderîye yê Îdareyê Xoserî Semîra Hec Elî da zanayene ke wextê rejîmê Baasî de pêro ziwanê bînî la bi taybetî kurdkî raştê teda û qedexeyan ameyêne. Semîra pare kerd ke Şorişê Rojawanî na rewşe vurnaya û Rojawan de pêro doman û ciwanî bi ziwanê xo yê dayîke perwerde vînenê. Semîra Hec Elî pare kerd ke ê seba perwerdeyê mamostayan zî enstîtuyan de dersan danê. 

Semîra Hec Elî vat: ''Sîstemê perwerdeyî yê netewe-dewletan keno ke merdiman tewrê sîstemî bikero. La sîstemê perwerdeyî yê Îdareyê Xoserî bi paradîgmaya ekolojîke, demokratîke û azadîgîre yeno dayene û keno ke komelêkê demokratîkî awan bikero. Sîstemê perwerdeyî yê Îdareyê Xoserî de her kes bi ziwanê xo perwerde vîneno.''