Xeylêk merkezanê Rojawanê Kurdîstanî de Komployê 15ê Sibate yê vera Rayberê Şarê Kurdî Abdullah Ocalanî ame şermezarkerdene.

Heleb de Yewîya Cinîyan ê Ciwanan taxa Şêx Meqsûdî de rayraşîyayîş kerd. Girseyî fotografê Rayberê Şarê Kurdî akerdî, meşaleyî vistî ta û alê yewîye berz kerdî. Dima înan sloganê sey ˊBê serok jiyan nabeˊ vatî û mîtîngêk kerd.

Hesekê de koçberanê Kampa Waşûkanî rayraşîyayîş kerd. Verê kampe de rayraşîyayîş vurîya mîtîngî. Mîtîng de qiseykerdoxan îfade kerd ke tecrîdê Îmraliyî şexsê Ocalanî de vera pêro kurdan yeno kerdene û heta ke Ocalan azad nêbo kurdî do azad nêbê.

Minbic de Meclîsê Cinîyan ê Zenobîya û Komîteya Şaredarîyan bi wesîleya serrgêra Komployê Mîyanneteweyîyî semînerêk da. Semînerî ra dima zî derheqê komployî de sînevîzyonêk ame mojnayene.