Kobanê, Şerawa û Minbicê Rojawanî de adirê Newroze ame tavistene. Şarê Rojawanî ke roşanê xo pîroz kerd, vera hêrişanê îşxalî mesajê xurtkerdişê têkoşînî da.

Kantonê Minbicî yê Rojawanê Kurdîstanî de bi seyan kesan Roşanê Newroze fîraz kerd. Şayîye de fotografê Rayberê Şarê Kurdî Abdullah Ocalanî ameyî akerdene. Dadîyanê şehîdan adirê Newroze vist ta.

Hemsereka Meclîsê Minbicî Ezabe El Ebod şayîye de pare kerd ke ê do bi ruhê Newroze Rayberê Şarê Kurdî azad bikerê û îşxalê dewleta tirke biqedînê.

Hemserekê Meclîsê Keyayanê Şehîdan Rebîi El Hemadeyî zî vat ke rayîrê azadîye û demokrasîyî azadîya Ocalanî de yo.

Endama Meclîsê Cinîyan ê Zenûbîya Ruweyde Hinêzil vat: ''Ma do meşaleya azadîye hîna berz bikerê ke dewleta tirke xîret kena ke aye hewna bikera.''

Şayîye de xeylêk hunermendî vejîyayî sehne ser û şarî pîya govende girewte.

Şerawa de şarî adirê Newroze vista, govende girewte û bi coşî roşanê xo Pîroz kerd. Şayîye de vera hêrişan mesajê têkoşînî ame dayene û azadîya Abdullah Ocalanî ameye waştene.

Şayîya Kobanê  de adirê azadîye ame tavistene û dormeyê ci de govende ameye girewtene. Aktîvîte de  de şar azadîya Rayberê Şarê Kurdî Abdullah Ocalanî waşte.