Rojawan de çalakîyê protestokerdişê hêrişê îşxalî yê dewleta tirke dewam kenê. Ewro Reyna Hesekê û Şadedê şar kuçeyan de bi.

Hesekê de rayberîya endamanê Kongreya Starî de xeylêk cinîyî verê baregehê Koalîsyonê Mîyannteweyî de ameyî pêser. Cinîyanê ke fotografê şehîdanê Helîncê kiriştî  6 kesan ra heyetêk rona ke berpirsîyaranê koalîsyonî de qisey bikerê. Heyetê derheqê hêrişanê dewleta tirke de mektubêk da merkezê koalîsyonî.

Endama Kongreya Starî ya Kantonê Hesekê Evîne Başo ke çalakî de qisey kerd ard ziwan ke dewleta tirke cinîyê ke semedê azadîye xo têkoşîn dane vera înan suc kena. Başo vist vîrî ke dewleta tirke ya îşxalkere 23ê hezîrane de hêrişê dewa Helincê ya Kobanê de Koordînasyonê Kongreya Starî ya Herêma Firatî ra Zehra Berkel û Hebûne Mele Xelîl û cinîya welatperwere Emîne Veysî qetil kerdî û vat hezê despotî cinîyan ê xoverdayoxan ra tersenê coka sey tehluke vînenê û hêrişê înan kenê.

Reyna Şadedê zî bi çalakîyêke hêrişê îşxalî ameyî protestokerdene û  vera îşxalî mesajê pîlkerdişê têkoşînî ameyî dayene.