Artêşa tirke ya îşxalkere dewa Ûm El-Kêfî daye bombayan ver. Netîceya hêrişî de erazîyê zîretî yê şarî vêşayî. Rîyê hêrişan ra mudaxeleyê şewatî nêame kerdene.

Roja 27ê gulane de zî erazîyê zîretî yê dewa Qasimîyê yê Til Temirî ameybî vêşnayene. Heman roje erazîyê dewa Qesarî yê Şehba zî bibî hedefê hêrişan û ameybî vêşnayene. Roja 23ê gulane de erazîyê dewa Ûm El-Kêfî yê ke kewenê dewa Qasimîyê û Rihanîyê yê Til Temirî ameybî vêşnayene. Roja 24ê gulane erazîyê dewanê Til Mihemed û Enîq El Hewa yê Zîrganî de zî şewat vejîyabi.

Dewleta tirke ya îşxalkere bi taybetî menga gulane ra nata hêrişê xo yê vera erazîyanê zîretî yê Rojawanî zêdînayî. Goreyê zanayîşanê ANFyî sere de Girê Sipî, Bab, Eyn Îsa, Til Temir, Şehba, Şêrawa û Kobanê menga gulane ra nata 40 herêman de erazîyê zîretî yê şarî ameyî vêşnayene. Şewatî tesîrê xeylêk dew û kesan kerd.

Dewleta tirke ya îşxalkere û cerganê DAÎŞî serra 2019î de zî mil dabi yewbînan û bi se hezaran erazîyê zîretî yê Rojawanî vêşnaybî û waştbi ke derbêke bidê ekonomîyê Îdareyê Xoserî.

Goreyê doneyanê Komîteya Ekonomî û Zîretî ya Îdareyê Xoserî serra vîyarte de 435 hezar û 500 donim erazîyê zîretî ameybî vêşnayene.