Dewleta tirke 9ê teşrîna verêne ya 2019î de hêrişê Serêkanîyê û Girê Sipî kerd û xîret kerd ke hêzanê QSDyî vila bikera. Dewleta tirke armanc kerd ke hîşmendîya xo ya qirkera ke xo ra berî pêro neteweyan înkar kena herême de serwer bikera. Şerwananê Rojawanî no planê dewleta tirke dî û verê xo da QSD. Şerwanan ANFyî reyde sebebê tewrbîyayîşanê xo ser qisey kerd.

Ciwanê bi nameyê Halim Minbicî vat: ''Ma zulmo ke vera herême yeno kerdene dî. Dewleta tirke armanc kena ke seba ke pêro Rojhelatê Mîyanênî îşxal bikera Rojawan de hêverî fîtne bikera  mabênê şaran. Dewleta tirke xîret kena ke ereb, sûryan, kurd û tirkan yewbînan ra cîya bikera. La wexto ke dewleta tirke hêrişê Til Ebyad û Serêkanîyê kerd dî ke erebî hetê kurdan de yê. Ma hêrişanê vera welatê xo rê tehamul nêkerd. Coka ma tewrê embazan bîyî. Bi taybetî Xoverdayîşê Rûmetî mi rê zaf tesîr kerdbi.''

Şerwanê bi nameyê Mecîdo ke Reqa ra yo, tewrê QSDyî bîyo. Mecîdî vat: ''Dewleta tirke herême de bi taybetî Dêra Zorê de wazena mabênê ma de fîtne bikera. Dêra Zorê de bi destê cerganê xo tay şêxî kiştî ke ereb û kurdî bikewê yewbînan. La ma nê nîyetê înan dîyî. Ma rêçê şehîdanê Xoverdayîşê Rûmetî bi tewrbîyayîşê QSDyî teqîb kerdî. Ma do destûr nêdê ke hêzê îşxalkerî ma bivisnê yewbînan. Ez venga pêro ciwananê herême dana ke tewrê QSDyî bibê û ma pîya welatê xo bipawê.''

Şerwana YPJyî ya bi nameyê Rîtace Minbîc zî vat: ''Ez wexto ke vera herêma ma hêrişî ameyêne kerdene tewra YPJyî biba. Verê çimanê ma de doman û cinîyî ameyêne qetilkerdene. Sey yew cinîye ez nêeşka tehamulê naye bikera. Ma armanc kenê ke vera îşxalan vinderê û cinîyan destê cerganê dewleta tirke ra bixelisnê. Ma hînî sey cinîyan zanenê xo senî bipawê, rêxistin bikerê û têkoşîn bikerê. Ma warê azadîya cinîyan de deyndarê Rayber Apoyî yê. Coka ma qet destûr nêdê îşxal û komployan. Ma do şorişê xo bipawê.''