Bi wesîleya serrgêra Şorişê 19ê Temmuze vizêr Rojawanê Kurdîstanî de xeylêk cayan de şayîyî ameyî kerdene.

Şayîya Qamişloyî Stadyumê Şehîdanê 12ê Adare de ameye kerdene. Şarê kurd, ereb,asûrî, suryanî, keldanî û ermanî yê ke herêma cizîre de ciwîyenê pê kincanê xo yê herêmkîyî tewrê şayî biyî.

Endamê Konseya Hemserekîye ya PYDyî Aldar Xelîl serrgêra şorişî pîroz kerd û vat: ''Ma do bi têkoşînî cewabê hêrişê îşxalî û tehdîtanê dewleta tirke bidê. Êyê ke nêwezanê no şar xoser biciwîyo do hêrişê ma bikerê. Verî çeteyan dima ra dewleta tirke hêrişê ma kerd. Rixmê heme hêrişan têkoşîno tarîxî yeno dayene. Nika rayberê dewletan fikîryenê ke senî şorişî bin bifînê. Wa bizanê ke nê şorişê ke morê xo eşt binê xeylêk serkewtişan do serkewtişê xo bidomno. No şoriş do bibo nimûneya Sûrîyeya demokratîke ke her kes bieşko tede biciwîyo. Nê şorişî de meseleyê merdiman yenê çareserkerdene. Nika dewleta tirke vana ez yena herra şima îşxal kena. Cewabê şarî eşkera yo. Eke hêriş bêro kerdene têna ciwanê ma nê  ma do pêro pîya vera ci vejîyê. Ma çirey nêvat ma Sûrîye cîya kenê. Ma tim vanê, ma wazenê komelêkê neweyî înşa bikerê ke dewletanê serdestan bibedilnê. No yew nimûne yo. Bi nê nimûne do Sûrîyeya demokratîke bêro înşakerdene. Semedê serkewtişî ganî heme şarê Sûrîye mewzîyanê têkoşînî de ca bigêro û wayîrê gonîya şehîdan vejîyo. 11 hezar şehîdî wazenê ke ma rêçê înan de têkoşînî xurt bikero. Ganî ma  projeyêkê demokratîkî înan rê dîyarî bikerê. Beno ke xetayê ma bibê la şoriş hema nêqedîyayo. Ma do her çî yew hete de biverdê û wayîrê welatê xo vejîyê. Bi nê zanayîş û qerardarîye ma do pêro pîya ser bikewê.''

Temsîlkaranê şaranê ereb û suryanîyan, Kongra Star û Meclîsê Keyeyanê Şehîdan zî derheqê şorişî de qisey kerd û vera hêrişan mesajê xurtkerdişê têkoşînî dayî. Şayî de xeylêk hunermendan zî konser dayî.

Reyna Kobanê, Şehba û xeylêk cayanê bînan ê Rojawanî de bi şayîyan Şorişê Rojawanî ame pîrozkerdene.