Cinîyê ke çar hetanê dinya ra bi zerrîwazî şîyî Rojawanî, awankerdişê cuyêka azade de, bi rolê girîngî têgêrenê. Şerwana enternasyonalîste ya YPJyî Comrade Dîlan derheqê babete de ANFyî rê qisey kerd.

Comrade Dîlan da zanayene ke 'YPJ Enternasyonal' binê sîwana YPJyî de yo û ê wazenê çarçewa Konfederalîzmê Demokratîkî de xo rêxistin bikerê, perwerde bikerê û bi aktîfî tewrê şorişê cinîyan bibê. Comrade vat: ''Xoverdayîşê Kobanê ra dima hîna zaf cinîyî tewrê ma bîyî. Naye ser o Tabûrê YPJyî yo Enternasyonalîst ronîya. Taburê ma nika perwerdeyê leşkerî û sîyasî vînenê, komel û kurdkî nêzdî ra şinasnaneê, waranê cîyayan de seba têkoşînî xo amade kenê.

Rojawan de şarî bi rayîrê komun û meclîsanê herêmîyan xo rêxistin kenê. Cinîyî her warê cuye de awanîyanê xo yê xoseran afernenê. Kooperatîfê cinîyan zî şensê xoserîya ekonomîke danê, Jieolojî bingeyê zanistê şorişê cinîyan îfade kena. Yewinê edaletê cinîyan, caardişê edaletî xo rê esas gênê. YPJyî reyde cinîyan hêzê xo yê xopawitişî awan kerdî. Nê pêro nîşaneyê serkewtişî yê Rojawanî yê.''

Comrade Dîlane derheqê sebebê hêrişanê vera Rojawanî de wina vat: ''Faşîzmê tirkan û cergê DAÎŞî hêrişê herêmanê azadan kenê. Ê wazenê pê îşxalê nê herêman sîstemê xo yê zorbazî û dişmenê cinîyan serwer bikerê. Şorişê Rojawanî bingeyê xo Paradîgmaya Neteweya Demokratîke ra gêno. Modelê Şorişê Rojawanî eşkeno pêro Rojhelatê Mîyanênî rê bibo çareserîye. Şorişê Rojawanî seba hêzanê ke Rojhelatê Mîyanênî vurnenê warê şerî tehluke yo.''