Vera Rojawanî hêrişê îşxalî û tehdîtê dewleta tirke çend şino zêdîyenê.  Vera nê hêrişan şarê Rojawanî payan ser o. Vizêr reyna xeylêk bajaran de çalakîyî ameyî kerdene.

Herêma Firatî ra bi seyan kesê ke verê baregehê Rûsya yê Kobanê de ameyî têhet bêvengîya Rûsya şermezar kerd. Çalakwanan fotografê hîrê şehîdanê YPJyî yê ke vera DAÎŞî şer kerd û hêrişanê peyênan ê dewleta tirke de ameyî qetilkerdene kiriştî û bi sloganan hêrsê xo ard ziwan. Qiseykerdişan de ame vatene ke ê do rixmê heme hêriş û tehdîtan wayîrê erd û ercanê xo vejîyê.

Qamişlo de dezgehanê cinîyan ê Rojawanî verê merkezê Neteweyanê  Yewbîyayeyan de çalakîye kerde. Cinîyan vist vîrî ke hêrişanê peyênan de hîrê fermandarê YPJyî ameyî qetilkerdene û vat: ''Dewleta tirke bitaybetî cinîyê ke vera DAÎŞî şer kenê înan hedef gena. Eynî wextî de  têkoşînê vera DAÎŞî sist kena. Hêrişê dewleta tirke yê vera herêma ma goreyê heqanê huqûqê mîyanneteweyîyî sûcê şerî yo ke ganî verê ci bêro girewtene.''

Tebqa û Dêrazor de  zî bi çalakîyan hêrişê îşxalî yê vera Rojawanî ameyî  şermerzarkerdene û veng dîya dezgehanê eleqedaran ke wa vera hêrişan bêveng memanê. Çalakîyan de ame vatene ke hêzê Rojawanî vera DAÎŞî ke pêro dinya rê bîyo bela şer kenê û şaranê dinya xelisnenê la dewleta tirke verê çimanê pêro dinya de  hêrişê şar û hêzanê Rojawanî kena û çewî ra veng nêvejîyeno.