Serekwezîra Almanya Angela Merkel verê cû wextêkê kilmî de Tirkîya zîyaret kerd û vat ke Almanya eşkena seba herêmanê îşxalbîyayeyan ê Rojawanî paştî bida Tirkîya. Na eşkerayîye verê muneqeşayanê pîlan akerd.

Meclîsê Almanya derheqê vatişanê Merkele de çend rojî verê cû raporêka amade kerdbi û pare kerdbi ke nê herêmî herêmê asayîşî ney herêmê îşxalbîyayeyî yê.

Rapor de ke waştişê parlamenteranê Daîreyê Xizmetanê Weşîye yê Meclîsê Federakî ra ame amadekerdene wina ame vatene: ''Xeberê derheqê rewşa asayîşî ya herêmanê ke hetê Tirkîya ra îşxal bîyî mojnenê ke nê herêman ser o tehlukeyo pîl esto.''

Raporî bale ante madeya 49. ya Peymana Cenevre ya Pawitişê Sivîlan ê Wextê Şerî de ser û îfade kerd: ''Hetê huqûqê îşxalî ra bedilîyayîşê merdiman o bi hawayêkê fermîyî yan zî girseyî qedexe yo.''

Derheqê tankanê Almanya yê seba hêrişê dewleta tirke yê vera Rojawanî de hema zî munaqeşeyî  dewam kenê. Wextêkê winasênî de xîretê Almanya yê seba meşrûkerdişê îşxalî bîyî babeta rexneyan.

Roniştoxê Serêkanîyê pê qayîl nîyê

Koçberanê Serêkanîyê zî yê ke îşxalê dewleta tirke de neçare mendî ke koç bikerê vera na gama Almanya nêrazîbîyayîşê xo mojna.

Roniştoxanê Serêkanîyê yê kurd û ereban ê ke nika kampa Waşokanî de manenê seba vatişanê ci Merkele rê vat: ''Gelo hayîya ci pê esta ke şima xîret kenê ke erdê kamî bidê kamî?''

Asîya Xalida erebe ya ke Kampa Waşokanî ya Hesekê de manena ard ziwan ke ê do qet na bira îşxalî qebul nêkerê. Asîya vat: ''Ma na bire qebul nêkenê. Ma senî eşkenê ke warê xo biteriknê û şorê cayê bînî? Ma wazenê abigêrê keyeyê xo. Gelo cayê înan keyeyê ma yê?

Şemse Bekîr Mihemedê erebî zî vat: ''Rewşa ma verê çiman de ya. La xemê dewletanê pîlan nîyo. Qala heqanê merdiman kenê, qala edaletî kenê labelê wexto ke babete biba ma her çi xo vîrî ra kenê.

Ronştoxanê Serêkanîyê ra Mihemed Musayî zî vat: ''Zimistan de ma teber de yê, kampe de yê. Ma waşt ke abigêrê keyeyê xo la ê wazenê keyeyanê ma de ca bidê cergan. Ez do senî abigêra?''

Şêxmûs Elî Tahîrî zî vat: ''Înan zaf cergî ardî û keyeyê ma de ca da nînan. Domanê ma kiştî, dest na keyeyanê ma ser, keyeyê mi vila kerd. Ez senî şora hetê înan?''

Berpirsîyarê Kampa Waşokanî Xalîd Xeloyî zî da zanayene ke Kampa Waşokanî de nufus resa 8 hezar û 500 kesan û vat: ''350 hezar kesan koç kerd. Tayê ci dibistanan de, kampan de tay zî şaristananê Rojawanî de ca bîyî.
Merkele qaşo ke vera îşxalan wurza payan ser, paştî dana îşxalan. Ma naye qebul nêkenê. Raporê Almanya rast o, ma tesdîq kenê. Erdo ke qala ci yena kerdene ame îşxalkerdene. Şarê nê erdî wayîrê ci yo. Ma îşxalan qet qebul nêkenê. Ma dı vera ci têkoşîn bikerê. Ma venga her kesî, dezgehanê mîyanneteweyan danê ke vera naye wurzê payan ser. Oyo ke kenê suc o. Êyê ke paştî danê nê sucdaran, hemkarê sucî yê.''