Roniştoxê Girê Sipî: Ma cuya xo ya verêne wazenê

Bi hezaran hemwelatîyê Girê Sipî yê ke rîyê hêrişanê Dewleta Tirkan û cerganê aye ra neçare mendî ke waranê xo ca biverdê Reqa de mîyanê şert û mercanê giranan de ciwîyenê.

Rîyê hêrişanê îşxalî yê Dewleta Tirkan û cerganê aye ra bi se hezaran merdimî neçare mendî ke waranê xo ca biverdê. Dima ke Girê Sipî, Serêkanîye û Silûk bîyî hedefê Dewleta Tirkan bi se hezaran merdiman koçê Reqa, Tebqa, Kobane û zaf cayanê Vakur û Rojhelatê Sûrîye kerd.

Beşêkê pîl ê merdiman Girê Sipî ra koçê Reqa kerd. Ebdûle Îmê ya ke wexto ke cergan hêriş kerd lajê ci verê çimanê aye de ameyo qetilkerdene rîyê hêrişanê Dewleta Tirkan a îşxalkere ra Girê Sipî ra koçê Reqa kerd.

Îme vat: "Wexto ke cergî ameyî ma neçare mendî ke biremê. Înan lajê mi verê çimanê mi de kişt. Ez çend rojî verê cû şîye keyeyê xo yê verênî, mi dî ke cergî her çî talan kerdî. Cergan mi rê vat ke 'Wa lajê to bêro.' Ez tersaya. Xora di lajê mi kiştî, têna yew mend. Ez reyna nêşîya. Nika ma keyeyêkê bêber û bêpace de manenê."

Esma Mihemed vat: "Rewşa ma rinde bî. Erebî û kurdî ma pîya ciwîyayêne. Erdogan û cergê ey ameyî û her çi xirab kerd. "

Roniştoxanê Girê Sipî ra yewî vat: "Bi taybetî şanan îşxalkerî dekewenê keyeyanê ma û her çi diznenê. Sey DAÎŞijan kincan danê xo ra, mabênê înan û DAÎŞijan de cîyatîyêke çin a.

Sey DAÎŞî emîrê înan estê. Ciranê ma yê kurdî estbî. DAÎŞijî dekewenê keyeyê înan û talan kenê. Ma tersa înan ver remayî ameyî Reqa. Ma cuya xo ya verêne wazenê. O çax aramîye estbî."

Eyran Ehmedî zî îfade kerd ke ê do nêverdê ke Erdogan erdê înan îşxal bikê û wazenê ke abigêrê erdê xo.