12ê adara 2004î de şaristanê Qamişloyî yê Rojawanî de maçê mabênê Sîhad Spor û Al Fotuwayî de polîsanê rejîmê Sûrîye bi desan kesî qetil kerdbî. Nê qirkerdişî ra dima hêverî Qamişlo dima zî şaristananê bînan de serewedaritişan dest pêkerdbi û nê serewedaritişan de zî xeylê kesî ameybî qetilkerdene.

Hemserekê Komîteya Karanê Zereyî ya Herêma Cizîre û şahîdanê Qirkerdişê 12ê Adare ra Kenan Berekatî ANFyî rê qalê serebûtanê a roje kerd.

Berekatî da zanayene ke dewleta Sûrîye qetî kurdî sey şarêk nêdîbi, tim polîtîkayê înkar û îmha ardê ca û nasname zî nêdayo kurdan. Berekatî vat: ''Serebûtê 12ê Adare wayîrê sebebanê tarîxîyan o ke sîyasetê înkarî zî sebebê ci yo verên o.

Serebûtê 12ê Adare Stadyumê Qamişloyî de dest pêkerd. Maçî ra ver rejîmê Sûrîye xîret kerdêne ke mabênê şaran de nîfaqî vejo û şaran bido şerkerdene. Maç de lejêk qewimîya. Kuluba Cîhadî kuluba Herêma Cizîre bîye, tede kaybazê kurdî, erebî û sûryanîyî est bîyî. Ê maçî de polîsan vera kaybazanê Cîhadî çeke ante. Seba ke şarî dî ke stadyumî ra hê cenazayî vejîyenê serewedarit. Serewedaritiş cade vilayê pêro Rojawanî bîyî. 12ê Adare de şarî kînê xo yê polîtîkayanê înkar, îmha û zulmî mojna.

Roja hîrêyîne de dewleta Sûrîye bi hezaran kesî destbend kerdî, tepiştî, îşkenceyî kerdî. Nê serebûtî ra dima rejîmê Sûrîye vera kurdan tedaya xo zêdînaye. Rejîmê Sûrîye kerd ke no serebût seke pêkewtişê mabênê şaran o bimojno. La mesele meseleya ereb û kurdan nêbîye. Mesele polîtîkayê înkar û îmha yê rejîmî bîye. Dewlete 12ê Adare de waşt ke şarî bikewê pê la şaran no kay pûç kerd.

12ê Adare 20 serrî xo pey de  verdayî. Ma hema paştîya xo danê mîrasê 12ê Adare. Ewro ruhê 12ê Adare gandar o. Ruhê 12ê Adare bi Îdareyê Xoserî û modelê neteweya demokratîke yê Rojawanî mende bi. 

Vera Îdareyê Xoserî zaf planî ameyî kerdene û yenê kerdene. Wextêk DAÎŞî, wextêk cîhadîstanê radîkalan hêriş kerd. Tim ame waştene ke eşîr û şarê Rojawanî bikewê pê. Ewro dewleta tirke zî kena ke herême de provakasyonan bikera. La şarê ma tim paştî dano Îdareyê Xoserî.

Menga adare menga xoverdayîşî ya û menga Newroze ya. Şaranê Rojawanî qetî teslîmîyet qebul nêkerd û tim xo ver da. 12ê Adare vera hêzanê îqtîdarî xoverdayîşêko pîl bi. 21ê Adare zî roja ma ya neteweyî ya û sembola xoverdayîşî ya. Şorişê Rojawanî bingeyê xo nê xoverdayîş û têkoşînî ser o na ro. Ma heta ewro bi hezaran şehîdî dayî. La ameyox ê şaran o; ê dîktator û îqtîdaran ney.''