Hemsereka TEV-DEMî Rûkene Ehmed bi wesîleya Newroze ANFyî rê qisey kerd.

Rûkene Ehmed ard ziwan ke Newroze roja serewedaritişê vera zulm, tarîtî û bêedaletî ya û vat: ''Newroze Zîndanê Amedî de manayêka newîye girewte. Mazlûm Doganî bi bedenê xo adirê Newroze gir kerd. Xêrê embazanê ma sey Zekîye Alkan, Rehşane Demîrel, Ronahî û Bêrîvane ra Newroze resaye leweyî. Nê embazanê ma vera zulmî sere wedarit.''

Rûkene Ehmed vist vîrî ke sey Vakur, Rojhelat  û Başûrî Rojawan de zî Newroze binê şertanê zehmetan de ameyêne fîrazkerdene û vat: ''Şayîyê Newroze qedexe bîyî. La têgêrayîşê azadîye yê kurdan ra dima ame famkerdene ke Newroze ganî senî bêra fîrazkerdene. Şorişê Rojawanî reyde şayîyê Newroze pêro Rojawanî ra vila bîyî. Ewro şarî bi hişmendî Newroze fîraz kenê.''

Rûkene Ehmed bale ante Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' ser û vat: ''Emser ma do Newroze de hemle biresnê asta tewr berze. Ma armanc kenê ke azadîya Rayber Apoyî 2024 de bîyarê ca. Pêro dinya zanena ke eke Rayber Apo azad bibo meseleya kurdan zî do bêra çareserkerdene. 

Ganî şarê ma emser bi xurtî tewrê şayîyanê Newroze bibê. Newroza 2024î do biba Newroza Rayber Apoyî. Ma ganî pêro waran de azadîya Rayber Apoyî biqîrê. Ma roja xoverdayîşî ya Newroze de şehîdanê xo yad bikerê û bimojnê ke ma tim rayîrê înan ser de yê.''