Endamê Konseya Hemserekîye ya PYDyî Salih Muslîmî derheqê gefanê dewleta tirke yê vera Rojawanî de ANFyî rê qisey kerd.

Muslimî îfade kerd ke Tirkîya aramî û haştîya Sûrîye nêwazena û vat: ''Her kes wazeno sere de ê Tirkîya hêzê xerîbî Sûrîye ra xo biancê. Tirkîya plananê xo yê Sûrîye de bin kewte. Îslîd de sereyê xo visna bela. Pêro dinya semedê aramîya Sûrîye çîyêk kena la Tirkîya vera gefan wanena. Helbet do menfaatanê Tirkîya rê fayde nêkero. Tirkîya mîyanê krîzê ekonomîkî yê pîlî de ya, şar vêşan o. Ekonomîya Tirkîya îflas kerda. Hukmatê Tirkîya semedo ke bala şarî bianca hetêkê bînî qala şerî kena.''

Muslîmî bale ante ser ke Serekê MÎTî Hakan Fîdanî vatbi ke 'Ma do sînorî ra çend topan bierzê û zemînê dekewtişê Sûrîye awan bikerê.' Muslimî vat: ''Nika hewceyê Tirkîya pê Fîdanî zî çin o, Sûrîye de cergê înan  estê. QSDyo ke cara 30 kîlomtereyan apey şîyo bi zelalî vano ke o do çîyêk nêerzo. Çunke dewaya QSDyî tîya de ya, uca de nê. Eke ca û warê to, dewê to îşxalkerde yê heqê to yo meşrû yo ke înan bipawî.''

Muslim derheqê kişîyayîşê 2 leşkeranê tirkan ê Ezazî de vat: ''Nê leşkerî erdê Sûrîye de kişîyayî. Ezaz de QSD, Hêzê Xelisnayîşê Efrînî (HRE), Rûsya, Îran estê. Kamî kişto eşkera nîyo. No heqê xoverdayîşî yo. Çi gureyê nê leşkeran Ezaz de estbîy. Serra 2019î ra nata Serêkanîyê û Girê Sipî de xoverdayîş esto. Şar uca de nêvindeno, xo paweno û xo ver dano. Beno ke no xoverdayîş kêm o la qetî do dewam bikero.''

Muslimî peynî de şerêkê muxtemelî yê Tirkîya ser o qisey kerd û vat: ''Rewşa Tirkîya nika zor a. Ewro ma xurtêr û zêdêr rêxistinî yê. Xoverdayîşê ma do cîya bibo. Şarê ma wayîrê tecrubeyan o, zor û zehmetîyî antî. Eke Tirkîya raşta zî şerêkê winasênî do biceribna no do bibo ceribnayîşê ci yo peyên. Tirkîya şerêkê muxtemelî de bi temamî do birijîya.''