Hemserekê Partîya Yewîya Demokratîke (PYD) Salih Muslimî hêrişê dewleta tirke yê verê  herême yê ke verê weçînayîşanê 11ê hezîrane de yenê kerdene ANFyî rê erjnayî.

Salih Muslimî nê vatî: ''Weçînayîşî semedê zixmkerdişê xizmetê şarî yenê kerdene. Weçînayîş do şertanê demokratîkan de bêro kerdene. Eleqeya nê weçînayîşî bi çewî çîn a  û raşt nîyo ke cayanê bînan rê bêro antene. Hêzê ke demokrasî hazm nêkenê, bitaybetî dewleta tirke û rejîmê Sûrîye nêwazenê şar bi xo îdareyê xo bivîjno û xo îdare bikero. Rojawan de weçînayîşo winayin do reya verêne bêro kerdene. Coka tay nê ra razî nîyê. Weçînayîşî do warê demokratîk û zelalî de bêrê kerdene.''

Salih Muslimî bale ante eşkerayîyanê Hetkarê Vervatoxê Wezîrê Karanê Teberî yê Amerîka ser û wina vat: ''Eşkerayîye de yeno vatene ke goreyê qerarê 2254î yê Neteweyanê Yewbîyayeyan Rojawan de îmkanê nê weçînayîşî çîn ê. Bi na eşkerayîye bale ancene çareserîya sîyasîye ser.  Qey înan wina eşkerayîyêke daye? Seba ke rojdemê dewleta tirke de yo û waşt babete biancê cayanê bînan ser. Heme welatanê Rojhelatê Mîyanênî de atmosfero têmîyankewte est o. Bewlî nîyo ke do Tirkîya se bikero. Tirkîya şina Amerîka ser û aye sey berpirsîyarê weçînayîşî vînena. Beno ke nê semedî ra wîna eşkerayîye ameye dayene. Rojawan goreyê şertanê xo û xoser weçînayîş keno.

Dewleta tirke sere ra vera nê weçînayîşan a.  Vera îradeyê şarî, vera demokrasîyî ya. Seba ke Rojawan de wayûbiratîya şaran mebo çîyo ke destê ci ra yeno kena. Eke herême de semedê demokrasîyî gamêke bêro eştene miheqeq vera ci vejîyena. Xora bi serran o dewleta tirke hêrişê Rojawanî kena.  Bitaybetî badê Pêkerdişê Komelkî bêtehamulîya ci zafêr bîye.  Dewleta tirke seba ke weçînayîşî mebê çîyo ke destê ci ra yeno kena. Vera weçînayîşan bêtahamulîya ci ya muazam est a. Îdareyo Xoser ê Rojawanî do miheqeq weçînayîşan bikero. Şarê ma do peyser game meerzo û şirê sindoqan ser û bi îradeyê xo temsîlkaranê xo bivjîno.''