Dewleta Tirkî ya ke bi rayîr û metodanê cîyayan hêrişanê xo yê hemverê Vakur-Rojakewtena Sûrîye domnena, dimayo ke Hêzanê Sûrîyeya Demokratîke (QSD) peynîya estbîyayîşê çeteyanê DAÎŞ’î arde giranî daye hêrişanê hucreyanê vinderteyan ser.

Hêzê QSD’yî û YPG’yî rojanê peyênan de Firat de operasyonêko taybet viraşt û xeylî kesê ke têkilîya înan bi îstîxbaratê Tirkî û DAÎŞ’î dir esta pîya bi teqemenîyan tepiştî. Endamanê çeteyan ê ke ameyî tepiştene derheqê plananê leyminan ê îstîxbaratê Tirkî û DAÎŞ’î yê hemverê herême û qewimîyayîşanê kiştişan de hayîdarîyê muhîmî dayî.

Metodê Leyminî yê MÎT’î

Îsa Ebdulfetah Hemûdo ke mengêk û nîm verî Reqa de ame tepiştene qalê metodanê leyminan ê dewleta Tirkî kerd. Hemûdî vat o ameyo wezîfedarkerdene ke tewrê QSD’yî bibo û jehr bikero mîyanê werê şerwanan. Hemûdî ard ziwan fermanê na yewe kesê bi nameyê Ebû Helayî dayo ke Tirkîya de yo û hemwelatijê Tirkîya yo. Hemûdî pêhesna ke Ebû Helayî ci rê gefî wendê û vato eke na yewe qebûl nêkero do keyeyê ê bikişo.

Sînorê Îdlib-Hatay de ‘Bazirganî’

Hemûdo ke herêma Meskene ya Helebî ray o, ard ziwan ke serra 2016 de seba karî serê Îdlibî ra şîyo Tirkîya û wextêk qezaya Zeytînbûrnû ya Stenbolî de xebetîyayo. Hemûdî vat gama ke Zeytînbûrnû de bîyo, verê xalê xo de kesê bi nameyê Ebû Helayî nas kerdo û vat, “Ebû Helayî mi rê pêşnîyar kerd ke serê sînorê Îdlib-Tirkîya de bazirganî bikerî, mi qebûl kerd.”

Hemûdî vat,”Dewleta Tirkî beranê mabênê Hatay û Îdlibî yê ke fermî nêyê, înan ra seba her saete 32 hezarî dollar gêna. Bi 32 hezarî dolarî qasê saetêk ber beno ê şima, şima eşkenê her çî ci ra ravêrnê. Bero nêfermî çend kîlometre dûrê Berê Sînorî yê Cîlvegozu (Bab el Hawa) bi û leşkero bi nameyê Emrahî yo payedar mesuldar bi.”

‘Bi Kiştişê Keyeyê Mi Gefî Wendî’

Hemûdî vat restoranêkê bi nameyê „Ebû Hela“ ke otogarê Enqereyî de bi mabênê ê û Ebû Helayî de Hezîran a 2018’î de problemêk vejîyayo û kar ra vejîyayo. Naye ser agêrayo Meskene verê keyeyê xo, Ebû Hela dimayê wextêk bi telefon resayo ê.

Hemûdî vat, “Gama ke ez ûca bîya rojêk Ebû Hela mi rê gêra û tayê çîyî persayî. Nuqteyê leşkerîyî yê tîyayî persayî. Mi ra waşt ke ez şirî Reqa û tewrê QSD’yî bibî û seba ê bixebetîyî. Gama ke mi ci ra vat ez qebûl nêkena, fotografê keyeyê min ê Meskene ramotî mi û gefî wendî ke ez vatişê ê bica nêarî her roje do keyeyê mi ra yew/e bikişo.“

Hemûdî vat naye ra ê verê xo dayo Reqa, dimayê wextêk ra Ebû Hela ro ci gêrayo û ê ra vato ke wextêkê kilmî de tewrê dewreya şerwananê neweyan ê QSD’yî bibo û ûca qeydê xo virazo. Hemûdî vat dimayê naye Ebû Helayî bi rayîrê cinîyêk tayê hebî resnayê ê û ê ra waşto ke înan bikero mîyanê werê şerwanan. Hemûdî vat hewna ke nê nêkerdo ameyo tepiştene.

‘Ebû Hela Îstîxbaratê Tirkî dir Xebetîno’

Hemûdî vat keso bi nameyê Ebû Hela Dera ray o, wextêko derg o Enqere de yo, pîya bi keyeyê xo hemwelatijîya Tirkî girewta û vat, “Kesêko xeylî dewlemend o. Nizdê otogarê Enqereyî restoranêko ê yo pîl yê bi nameyê Ebû Hela esto. Hatay de fîrmaya ci ya otobusan esta. Îstîxbaratê Tirkî dir xebetîno.”