Çend rojî verê cû paytextê Almanya Berlin de hîrê wesayîtê şîrketa asin-çêlikî ya almanan ThyssenKrupp amebî vêşnayene. Bi çalakîyanê hemwextan ê taxanê cîyayan ê Berlinî de wesayîtî ameybî vêşnayene.

Polîsan derheqê serebûtî de dest pê cigêrayîşêkê hîrayî kerd. Koma çepe ya radîkale Almanya keyerîpelê înternetî de bi maîlê  indymedia.orgî eşkerayîyêke weşanaye û çalakîya vêşnayîşê hîrê wesayîtan girewte xo ser. Eşkerayîye de ame parekerdene ke ThyssenKrup seba ke îşxalê dewleta tirke yê vera Rojawanî de malzemeyê leşkerîyî erşawitî artêşa tirke bi hedefê înan.

Koma çepe da zanayene ke ê do heat peynî paştî bidê xoverdayîşê Rojawanî yê vera îşxalî û vat: "Ma bi na çalakîya xo waşt bimojnê ke Îdareyo Xoser ê Rojawanî têna nîyo.'' Koma çepe bale ante hemkarîya wextê peyênî ya ThyssenKruppî ya bi dewleta tirke û vat: "Armancê ma yê çalakîyanê bi nê hawayî no yo ke peynîya hemkarîya dewleta tirke bîyarê."

Çalakîya vêşnayîşê wesayîtan ra dima ThyssenKruppî kombîyayîşê xo yê Heyetê Îdareyî yê şaristanê Bochume batal kerd. Sereka Heyetê Îdareyî Martîna Merz çalakîye ra dima eşkerayîyêke weşanaye û îdîa kerd ke ê zaf biqesawet ê.