Hêrişê îşxalkarîye yê dewleta Tirkî ya îşxalkare yê verba Vakur û Rojakewtena Sûrîye dewam kenê. Dewleta Tirkî çeteyanê xo yê El Qaîde reyde hêrişê xo giran kerdî. Serêkanîye de vizêr şan derbeyê giranî dewlete û çeteyanê ci rê ameyî pirodayene.
Verba artêşa Tirkî û çeteyanê ci yê ke xîret kenê dormeyê şariştanê Serêkanîyê bigêrê, şervanê QSD'yî vizêr şan hîrê hetan ra opersyonî kerdî û netîceyê ci de tewr tay 25 çeteyî ameyî kiştene û bi desan çeteyî zî birîndar bîyî.
Cepheyê Rojawanî
Verba îşxalkarîyanê ke waşt bajarekê Til Xelef ê rojawanê şaristanî îşxal bike, şervanî hîrê baskan ra kewtî mabênê têgêrayîşî û derbeyêka girane daye çeteyan ro. Merkezê Til Xelefî konrolê şervanan ê QSD'yî de yo. Îşxalkaran waşt di baskan ra, Serêkanîye-Til Xelefî û Til Xelef-Til Erqume ra dormeyê bajarekî bigêrê. Labelê hêzanê QSD'yî verba îşxalkaranê ke waşt ver bi şorê dest pê operasyonî kerd û çeteyan waşt ke dormeyê înan bigêrê, la dormeyê çeteyan ame girewtene. Şer hema zî dewam keno. Şer de tewr tay 19 çeteyî ameyî kiştene.
Şero ke dewleta Tirkî ya îşxalkare bi teyarayanê şerî û obusan keno hema zî dewam keno. Hetê bîn de teyarayanê şerî yê Tirkî keyeyêkê bajarekî rê hêriş kerd û sivîlêko nameyê ci nêno zanayene şehîd bi, sivîlêk zî birîndar bi.
Cepheyê Rojakewtene
Rojakewtena Serêkanîye de, çeteyanê ke herêmanê deweka Miçî û Pîşesazîye de waşt ver bi başûrî şorê û rayîrê Serêkanîyê-Dirbêsîye bibirnê û bi nê hewayî dormeyê şaristanî bigêrê, vizêr şanî derbeyê giranî werdî. Herêma Pîşesazîye rê hêrişê îşxalkaran ameyî kerdene, şer de tewr tay 16 îşxalkarî ameyî kiştene.
Cepheyê Başûrî
Çeteyan seba ke dormeyê Serêkanîyê bigêrê başûrê şaristanî ra hucreyê xo yê kahanî kerdî mîyan. Hucreyê çeteyan mabênê dormegirewtişê şervanan ê QSD'yî de mendî. Serê rayîrê Serêkanîye-Hesekî çar çeteyî ameyî kiştene û panc çeteyî zî ameyî girewtene.
Şer Dewam Keno
Rojawanê şaristanî de (Til Xelef) û rojakewtena şaristanî de (Mezrê) şer pê çekanê giranan dewam keno. Îşxalkarî bi obusan hêrişê şaristanî kenê, şervanî zî bi çekan cewab danê. Şer dewam keno.
Planê Îşxalkaran Çi yo?
Îşxalkarê ke wazenê dormeyê Serêkanîye bigêrê rojakewtene ra û rojawanî ra ver bi başûrî wazenê rast e rast şorê. Heman wextî de Girê Sipî de xîret kenê ke rojakewtene de û rojawan de vila bibê û bi nê hewayî şaristanan bigêrî. Gama diyîne de zî plan kenê ke wareyê 120 kîlometreyî ra mabênê Serêkanîyê û Girê Sipî îşxal bikê.
