Eşîrê ereban ê herême ke destê çeteyanê DAÎŞî ra zaf dejî antî, nika binê serbanê Meclîsê Eskerî yê Dêra Zorî de operasyonê hemverê DAÎŞî de ca gênê. Rayberê eşîran ê herême yê ke ANFyî rê qisey kerd vat ke ê sey şarê herême binê serbanê QSDyî de bîyê  yew û na yewîye taktîkkî nê stratejîk a.    

Rayberê eşîra Şihêtatî Necîm Necrîso ke lajêk ci hetê DAÎŞî ra kişîyayo ard ziwan ke zafaneyê erdê înan bi fedakarîya QSDyî çeteyan ra ameyo pakkerdene û dima ke DAÎŞ bi temamî bêro qedênayene do şaristananê xo reyna awan bikerê.

'MA WAZENÊ KE ŞARÊ XO RÊ XIZMET BIKERÊ'

Necrîsî qiseykerdişê xo wina dewam kerd: „Xeylî hêzê ameyî şaristanê ma, la ma ê qebûl nêkerdî. Nika QSD ameyo û ma atmosferêkê demokratîkî mîyan de ciwîyenê. Înşalah gama bajarê ma bi temamî azad bibo ma do hîna çîyanê rindan bikerê.“

'MA XO BI HAWAYÊKÊ DEMOKRATÎKÎ ÎDARE KENÊ'

Necrîsî vat: „Verî ma nêeşkayêne vengê xo vejê. La nika rojhelat û vakurê Sûrîye de ma eşkenê waştişanê xo biresnê her cayî. Ma sîstemê xo yê zereyî, şaredarîya xo û sîstemê xo yê huqûqî hêdî hêdî awan kenê. Mi lajêkê xo şehîd da. Ma amade yê ke seva her metreyêkê erdê xo feda bibê.“

'EKE MA DEST NÊDÊ YEWBÎNAN MA DO CÛM BIBÊ'

Hisêl Eyd El Behrûz ke serekê eşîra Dilêmî yê nizdê şaristanekê Ebû Kemalî yê sînorê Iraq-Sûrîye yo vat ke ê heman keştî de yê û wina dewam kerd: „Tîya cayêkê Tirkîye yan zî Îranî nêyo. Ma sey şarî wayîrê tîya yê. Eke ma dest medê yewbînan û keştî cûm bibo ma do heme bimirê.“ 

'GANÎ HER KES ŞARISTANÊ XO ÎDARE BIKERO'

Hisêl Eyd El Behrûzî ard ziwan ke ê nêwazenê Sûrîye perçe bibo, labelê heman wextî de nêwazenê çew teber ra yan zî merkezêk ra înan îdare zî bikero. Behrûzî vat: „Ganî derheqê qedera her şaristanî de şarê ci qerar bido. Ma sey hêzanê demokratîkan ê Sûrîye nê wazenê.“ 

'MA DO PÎYA AWAN BIKERÊ'

Serekêko bîn ê eşîra Şihêtatî Ebdulbasit Elî zî nê vatî: „Eşîra mi Meclîsê Eskerî yê Dêra Zorî de cayê xo gêna. Nika QSD erdanê ma azad keno. Ma hemverê çeteyan de şerr kenê û ma komunî awan kerdî. Nê karê xeylî pîl ê.“